Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 185 Hüküm no: 220 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Attar Aron v. İlya’nın ıtriyat bedelinden iki yüz elli guruş alacağının Kamal Yahûdi’ye havalesini kabul ettikten sonra pişman olup tekrar Mustafa Beşe aleyhine dava açmasının meşru olmadığı Galata’da mütemekkin Attâr Aron v. İlya nâm Yahûdi Galata Bâb Mahkemesi’nde meclis-i şer‘de Mustafa Beşe b. Mehmed nâm kimesne muvâcehesinde mezbûr Mustafa Beşe zimmetinde attâr emti‘ası semenlerinden alacağım olan yedi yüz kırk bir guruşun dört yüz doksan bir guruşunu yedinden ba‘de’l-ahz bâkī iki yüz elli guruş deyni ile beni gāib ani’l-meclis Kamal Yahûdi üzerine üçümüz bir meclisde iken havâle-i mutlaka-yı sahîha-i şer‘iyye ile havâle eyledikde ben ve gāib-i mersûm havâle-i mezkûreyi ba‘de’l-kabûl gāib Yahûdi-i mersûm dahi cihet-i havâleden deyni olan iki yüz elli guruşun yüz yirmi guruşunu bana edâ ve teslîm bâkī zimmetinde yüz otuz guruş kalmışidi lâkin ben ber-vech-i meşrûh gāib-i mersûmdan havâleyi kabûlüme nâdim ve pişmân olmamla meblağ-ı bâkī-i mezkûru muhîl-i merkūmdan taleb ederim deyü tasaddî eylediği da‘vâsı takrîr-i meşrûhu üzere sübûtu mütehakkık değil iken meşrû‘a olmayıp kelâmına şer‘an iltifât olunmadığı bi’[l]-iltimâs huzûr-ı âlîlerine i‘lâm olundu. Fî selhi R sene [1]221.