Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 194 Hüküm no: 238 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Sâdık’ın hem kiracısı hem de hissedarı olduğu kahvehanedeki hissesini Berber Hacı Hüseyin’e devrettiğinden diğer hissedarların kahvehaneyi yine kendisine kiraya vermeye zorlayamayacağı Mahrûse-i Galata’da Karaköy nâm mahalde kâin Ayasofya-i kebîr Vakfı’ndan bir kıt‘a kahvehânenin altı hisseden bir sehm hissesine ber-mantûk-ı temessük-ı mütevellî mutasarrıf olan Sakalar Kethüdâsı es-Seyyid Mehmed Sâdık b. Mehmed nâm kimesne mahrûse-i mezbûre Bâb Mahkemesi’nde meclis-i şer‘-i kavîmde dükkân-ı mezbûrun dört sehmine mutasarrıf olan Berber el-Hâc Hüseyin b. Abdullah ve bir hissesine mutasarrıfe zâtı mu‘arrefe Zeyneb bt. el-Hâc Abdullah hatunun muvâcehelerinde ben ber-vech-i meşrûh mutasarrıf olduğum bir sehm hissemi şürût-ı âdî ferağ-ı kat‘î-i mu‘teber ile mezbûr el-Hâc Hüseyin’e bâ-re’y-i mütevellî ferağ ve tefvîz eylediğimde ol dahi tefevvüz ve kabûl edip lâkin dükkân-ı merkūmun hâli gediğine bundan akdem rağbet verip gedik ittihâz etmemle icâre-i misliyyesiyle yine bana icârelerine mezbûrân el-Hâc Hüseyin ve Zeyneb Hatun’a cebr olunmak matlûbumdur deyü tasaddî eylediği gedik da‘vâsı iltifâta şâyân olmamağla bî-vech mezbûrâna mu‘ârazadan ba‘de’l-men‘ dükkân-ı merkūmu hâliyeten mutasarrıfları mezbûrâna teslîme mezbûr es-Seyyid Mehmed Sâdık’a bi’t-taleb tenbîh olunduğu bi’l-iltimâs huzûr-ı âlîlerine i‘lâm olundu. Fî 7 Ca sene [1]221.