Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 194 Hüküm no: 239 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Mehmed b. Ahmed’in iptal olunan dükkan gediği satışında Ahmed Beşe b. Hasan ile otuz guruşa sulh olduğu Tütüncü esnâfından Mehmed b. Ahmed nâm kimesne Galata’da mahfil-i kazâda Ahmed Beşe b. Hasan muvâcehesinde mezbûr Ahmed Beşe yedinden iktirâz ve kabz ve umûruma sarfla istihlâk eylediğim 667 guruş deynimi müddet-i ecelinde? kendiye edâ ve teslîm eylediğimde ol dahi geri bana vermeğin mahrûse-i Galata’ya muzâfe kasaba-i Tophane’de vâki‘ bir tarafdan kerhâne ve bir tarafdan abacı dükkânı ile mahdûde bir kıt‘a duhâncı dükkânı derûnunda mevcûde beyne’l-hiref gedik tâ‘bir olunur âlât-ı lâzıme-i ma‘lûmemi mezbûr Ahmed Beşe’ye bey‘ ve teslîm etmişidim el-hâletü hâzihî bey‘-i merkūm şart-ı mezkûre mukārenetle fâsid olmağla meblağ-ı merkūm 667 guruş yedimden ahz-birle âlât-ı merkūmeyi bana teslîme mezbûr Ahmed Beşe’ye tenbîh olunmak matlûbumdur deyü tasaddî eylediğim da‘vâmdan mezbûr Ahmed Beşe ile 30 guruş bedel-i makbûza ba‘de’s-sulh ve’l-kabûl husûs-ı mezkûra ve bedel-i sulh-ı merkūma müte‘allika da‘vâdan herbirimiz âharın zimmetini ibrâ ve iskāt ve herbirimiz ber-vech-i muharrer ibrâ-i mezkûrumu[zu] kabûl-birle kat‘-ı münâza‘a eyledik deyü ikrâr ve tasdîkleri tescîl ve bi’l-iltimâs huzûr-ı âlîlerine i‘lâm olundu. Fî 2 Ca sene [1]221.