Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 195 Hüküm no: 240 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Mihayil v. Dimitri’nin nizama aykırı olarak yeni berber dükkanı ihdasından men olunduğu Galata ve tevâbi‘inde vâki‘ berber esnâfının bâ-berât-ı âlîşân kethüdâları es-Seyyid el-Hâc Mustafa Ağa ve yiğitbaşıları es-Seyyid Osman Çelebi ve çavuşları Molla Ali ve zimmî ustalarından olup Galata Bâb Mahkemesi’nde meclis-i şer‘-i münîrde esnâf-ı merkūmede Mihayil v. Dimitri zimmî muvâcehesinde işbu yedimizde olan emr-i âlî ve sûret-i defter-i hâkānî nâtık olduğu üzere Galata ve tevâbi‘inde vâki‘ berber dükkânı 295 adede münhasır ve dekâkîn-i merkūme kâfi ve vâfî olup ziyâde dükkânı ihdâs bâ-emr-i âlî memnû‘ iken mersûm Mihayil Tatavla karyesinde kâin mütemekkin olduğu berber dükkânına adem-i kanâ‘at-birle mugāyir-i fermân-ı âlî etmeyip [edip] Galata hâricinde Saray-ı Sultânî karşısında Kalafatcıbaşı Yunus Ağa Mahallesi’nde bir kıt‘a manav dükkânını tebdîl ve berber dükkânına tahvîl ile müceddeden berber dükkânı ihdâsına şürû‘ edip ol vechile nizâmımızın ihtilâline bâ‘is hâlâ ictisâr etmekle mersûma bi’d-defa‘ât tenbîh eylediğimizde aslâ tenbîh [mütenebbih] olmayıp mugāyir-i emr-i âlî hareketde ısrâr üzere olmağla zimmî-i mersûm mugāyir-i emr-i âlî hareketden men‘ ve tedîb oluncaya kadar bir müddet esnâf-ı merkūmeden tard ve teb‘îd olunması matlûbumuzdur deyü mazmûnu min-külli’l-vücûh takrîr-i meşrûhlarına mutâbık bir kıt‘a emr-i âlî ve sûret-i defter-i hâkānî ibrâzıyla teşekkî ve da‘vâ eylediklerinde zimmî-i mersûm dahi cevâbında mazmûn-ı emr-i âlîşân mukaddem ber-vech-i meşrûh berber dükkânı ihdâsı dâ‘iyesinde olduğunu mu‘terif olmağın mûcebince mersûm Mihayil mütemekkin olduğu kadîm berber dükkânına kanâ‘at-birle ziyâde dükkân ihdâsı dâ‘iyesiyle mugāyir-i fermân-ı âlî [hare]ketden men‘ olunduğu bi’[l]-iltimâs huzûr-ı âlîlerine i‘lâm olundu. Fî 5 Ca sene [1]221.