Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 195 Hüküm no: 241 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin kendisini dövüp parasını aldığı iddiasıyla Seyyid Hasan Çelebi aleyhine açtığı davada iddiasını ispat edemediği Mustafa Beşe b. el-Hâc Ali nâm kimesne Galata’da mahfil-i kazâda es-Seyyid Hasan Çelebi b. Mehmed muvâcehesinde mezbûr es-Seyyid Hasan Çelebi târih-i i‘lâm günü beni kasaba-i Kasımpaşa’da sâkin olduğu menziline götürüp bir kîse derûnunda mevcûde mâlımdan elli guruşumu bi-gayr-ı hakkın ahz ve beni bıçak kabzası ile darbetmekle mûcib-i şer‘îsini taleb ederim deyü eylediğim darb da‘vâmdan meccânen fâriğ olup ancak darb-ı merkūma müte‘allika da‘vâdan mezbûru kabûlü hâvî ba‘de’l-ibrâ ve meblağ-ı merkūm elli guruşu hâlâ istirdâd ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsına ikāmet-i beyyine edemeyip bi’t-taleb mezbûr es-Seyyid Hasan Çelebi ba‘de’t-tahlîfü’ş-şer‘î mûcebince müdde‘î-i mezbûr elli guruş mütâlebesiyle mezbûr es-Seyyid Hasan Çelebi’ye bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 10 Ca sene [1]221.