Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 834 Hüküm no: 1086 Orijinal metin no: [131a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Arapkir kasabasındaki cizye defterinde kayıtlı olmayıp başka şehirlerde bulunan zimmîlerin cizyelerinin tahsili Vilâyet-i Anadolu’da Arapkir kasabasında cizye defterinde mukayyed olup âhar diyârda olan zimmîlerin üzerlerine lâzım cizyeleri cem‘ine emr-i sultânî ile memûr olup kasaba-i mezbûre ahâlîsinden olan Avanos v. Erek ve Mardiros v. Bağdasar nâm zimmîler meclis-i şer‘de fi’l-asl kasaba-i mezbûre ahâlîsinden olup hâlâ mahmiye-i İstanbul’da sâkinler olan Kirkor v. Agop ve diğer Kirkor v. İsayi ve Mendesar v. Avanos ve Simon v. Melkon ve Haçador v. Zeki ve Avanos v. Zeki ve Marat v. Zeki ve Asvador v. Samel ve Haçador v. Dolet ve Marat v. Toros ve Kirkor v. Toros ve Zakaroğlu Aleksan v. Agop ve Begos v. Kiragos ve Avanos oğulları ve Mardiros v. Bahadır ve ( ) v. Bahadır ve Amuca v. ( ) ve Siçim v. Bedros ve Sermekis ve Midane Göbrenek oğulları ve Oseb v. Mardiros ve Yakovişe v. Kapsar ve Nikefos v. Minas ve Asvador v. Bedolet ve Bedros v. Sultana ve Agop v. Şakab ve Haçador v. Ovanes ve Bedros v. Nikefos ve Kazar v. Nikefos ve Asvador v. ( ) ve diğer Asvador v. Gacan ve Aleksan v. Bostancı ve Mardiros v. Asvador ve Melkon v. Same nâm zimmîler taraflarından husûs-ı âti’l-beyâna sâbitü’l-vekâle vekîlleri olup kendi tarafından asîl olan işbu ashâbü’s-sifr Dervak v. Serabil ve Ohan v. Agop, Nehri v. ( ) ve Kasbar ve Agop ve Aranaton ve Mardiros veledey Melkon ve Mıgırdiç v. Ester ve Maksud v. Serkis ve Avanos v. Mirek ve Serkis v. Avanos ve İmircan v. Ağacan ve Nazaroğlu Avanos v. Maksud nâm zimmîler mahzarlarında her biri takrîr-i kelâm edip mezbûrûndan ba‘zısının dedeleri yedlerinde olan tuğrâlı ve nişânlı ma‘mûlün-bih defter nâtık olduğu üzre Medîne-i Münevvere re‘âyâsına ilhâk olundukları mukarrer olmağın ba‘de’l-yevm biz mezbûrlardan cizye taleb etmeyip ve mezbûr dahi kasaba-i mezbûre zimmîlerinden olup âhar yerde deftere kayd olunmayanlardan cizye taleb ettiğimizde bi gayrı vechin bize mâni‘ler olmamak üzre kavl ve ittifâk eyledik dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene seb‘a ve seb‘în ve elf. Şuhûdü’l-hâl: Mehmed Çavuş b. Ali el-Mübâşir, fahrü’l-akrân Mehmed Çelebi b. ( ) Kethüdâ-yı muhzırân, İbrahim Çelebi b. Ahmed, Hasan Çelebi b. Ahmed, Mustafa Çelebi b. Ahmed.