Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 835 Hüküm no: 1087 Orijinal metin no: [131b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hatun’un ölen kocası Mehterbaşı Mustafa Ağa’nın terekesinden mehrini ve hissesini talep için vekil tayin ettiği Husûs-ı âti’l-beyânın mahallinde tahrîri iltimâs olunmağın taraf-ı şer‘-i şerîfden irsâl olunan mevlânâ İbrahim Efendi b. Şeyh Hızır, umdetü’l-emâsil ve’l-a‘yân Atâullah Ağa b. Abdülmu‘în’in mahmiye-i İstanbul’da İshak Paşa mahallesinde vâki‘ menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf ettikde mahmiye-i mezbûrda Kabasakal Sinan Ağa mahallesinde sâkin iken bundan akdem vefât eden mehterbaşı Mustafa Ağa’nın veresesinden zevce-i metrûkesi umdetü’l-muhadderât Âişe Hâtun bt. Karakaş Ali Ağa zâtını ma‘rifet-i şer‘iyye ile ârifûn İmâm Abdurrahman Efendi b. Mahmud ve Mahmud Bey b. Bayezid ve el-Hâc Bâli Ağa b. Yakub ta‘rîfleri ile mu‘arrefe oldukdan sonra meclis-i ma‘kūd-ı mezbûrda babasının li ebeveyn ammi oğlunun oğlu olup müteveffâ-yı mezbûrun li ebeveyn karındaşı olan râfi‘ü’l-kitâb İlyas Ağa b. ( ) mahzarında ikrâr ve takrîr-i kelâm edip müteveffâ-yı mezbûrun zimem-i nâsda olan hukūkundan ve sâir terekesinden müteveffâ-yı mezbûr zimmetinde mütekarrir olan kırk bin akçe mehr-i müeccel hakkımı ve bâkīden hisse-i şer‘iyyemi tereke-i müteveffâ-yı mezbûra vâzı‘ü’l-yed olanlardan taleb [ve] da‘vâ ve ahz [ve] kabz ve bana îsâle ve kabz ve îsâl mütevakkıf olduğu umûrun küllîsine tarafımdan mezbûr İlyas Ağa’yı vekîl ve nâib ve menâbıma nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya ta‘ahhüd eyledi dedikde, gıbbe’t-tasdîk husûs-ı mezbûru mevlânâ-yı mezbûr mahallinde tahrîr ba‘dehû ma‘an irsâl olunan Ramazan b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Mehmed Efendi [b.] Ahmed el-Müderris, Mehmed Çelebi b. İbrahim, Ali Bey b. Rıdvan, Şeyh Mehmed Çelebi b. Lütfullah, Mehmed Halîfe b. Ahmed el-Müezzin, Osman Bey b. İbrahim, Ali Bey b. Mehmed, Yusuf Bey b. Abdullah, Musa b. Mehmed.