Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 197 Hüküm no: 244 Orijinal metin no: [22b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derohi bt. Ohannes’in tahliye olunan evini kiraya verirken aldığı peşin paradan kiracısı Varvarine bt. Menahim’e yüz yetmiş iki guruş borcu olduğu Galata hâricinde Tomtom Mahallesi’nde mütemekkine mu‘arrefetü’ş-şahs Varvarine bt. Menahim nâm Nasrâniye Galata Bâb Mahkemesi’nde meclis-i şer‘de kezâlik şahsı mu‘arrefe Derohi bt. Ohannes nâm Nasrâniye muvâcehesinde ben mersûme Derohi Nasrâniye’nin mahalle-i mezkûrede vâki‘ bir bâb menzilinde müsteciri olup târih-i i‘lâmdan bir gün mukaddem fesh-i icâre-birle ben menzil-i mezkûrdan hurûc etmişidim lâkin menzil-i mezkûrun kirâ nâmıyla merkūme Derohi Nasrâniye’ye ber-vech-i peşin medfû‘um olan yüz yetmiş iki guruşu mersûme Derohi Nasrâniye’den istirdâd ederim deyü ba‘de’d-da‘vâ ve’l-ikrâr alâ-mûcibi ikrârihâ meblağ-ı mezbûr yüz yetmiş iki guruşun müdde‘iye-i mersûme Varvarine Nasrâniye’ye redd ü teslîmiyle mersûme Derohi Nasrâniye ilzâm olunduğu bi’l-iltimâs huzûr-ı âlîlerine i‘lâm olundu. Fî 9 Ca sene 1221.