Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 198 Hüküm no: 248 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Bedros v. Manyel’in riba adı altında aldığı bin beş yüz doksun guruş Yelkenci Halil Ağa’ya iâde etmesine karar verildiği Galata’da sâkin Yelkenci Halil Ağa b. Ömer nâm kimesne Galata Bâb Mahkemesi’nde meclis-i şer‘-i münîrde Galata’da vâki‘ Havyar Hanı derûnunda mütemekkin tüccârdan Bedros v. Manyel nâm zimmî muvâcehesinde yedimde olup işbu meclis-i şer‘de kırâet olunan mührü fekkolunmuş bir kıt‘a deyn temessüğü nâtık olduğu üzere mersûm Bedros zimmî ile şerîki gāib ani’l-meclis şerîki Nemçeli Çolak Kostantin’in mâllarından ve mersûm Bedros zimmî yedinden bundan akdem iştirâ ve kabz eylediğim ma‘lûmü’l-vezn halat semeninden deynim olan dört bin sekiz yüz guruşu mersûm Bedros zimmîye tamamen def‘ u teslîm eylediğimde ol dahi ba‘de’l-kabz meblağ-ı mezkûr için bilâ-devr-i şer‘î ribâ nâmıyla mâlımdan bin beş yüz doksan guruşumu mersûm Bedros zimmî ahz etmekle istirdâd ederim deyü ba‘de’d-da‘vâ ve’s-suâl ol dahi cevâbında ber-vech-i muharrer dört bin sekiz yüz guruş tamamen ahz u istîfâ eylediğini ikrâr lâkin meblağ-ı merkūm için gāib-i mersûm Kostantin bilâ-devr ribâ nâmıyla müdde‘î-i merkūm mâlından ancak bin üç yüz guruş kabz etmişidi deyü müdde‘î-i mezbûrun müdde‘âsını inkârından mâ‘adâ müdde‘î-i mezbûr husûs-ı mezbûr için benim ile aslâ da‘vâ ve husûmeti olmadığını târih-i i‘lâmdan kırk gün mukaddem ikrâr ve işhâd etmişidi deyü eylediği def‘ini müdde‘î-i mezbûr Halil Ağa külliyyen inkârından başka mersûm Bedros zimmî ber-vech-i muharrer bilâ-devr ribâ nâmıyla mâlımdan bin beş yüz doksan guruşumu ahz u kabzını ve meblağ-ı merkūm bana zimmetinde deyni olduğunu târih-i i‘lâmdan yirmi gün mukaddem Galata’da Yelkenciler sûkunda Kahveci Mehmed Ârif nâm kimesnenin kahve dükkânında huzûr-ı Müslimînde kirâren ve mirâren tâyi‘an ve kat‘iyyen ikrâr ve işhâd dahi etmişidi deyü muahhar tarihle eylediği ikrâr lede’t-tezkiye adâletleri zâhir olup makbûlü’ş-şehâde idükleri ihbâr olunan Bezci Mellâh Ahmed b. Abdullah ve Yelkenci Mehmed b. Osman ve Kahveci Mehmed Ârif b. Hasan ve Mehmed Nuri b. Kemaleddin ve el-Hâc Ahmed Ağa b. İbrahim ve es-Seyyid Osman Ağa b. Mustafa ve Mehmed Kadri b. Musa şehâdetleriyle mersûm Bedros zimmî muvâcehesinde vech-i şer‘î üzere isbât etmeğin mûcebince meblağ-ı merkūm bin beş yüz doksan guruşu müdde‘î-i mezbûr Halil Ağa’ya tamamen redd ü teslîme mersûm Bedros zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 16 Ca sene [1]221.