Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 199 Hüküm no: 249 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Horalı Yamandi’nin hamr bedelinden Şerbetçi Corci’den yirmi beş guruş alacağı olduğu Şerbetçi Horalı Yamandi v. Yamato nâm zimmî Galata Bâb Mahkemesi’nde meclis-i şer‘de Galatalı Şerbetçi Corci v. Yani nâm zimmî muvâcehesinde mersûm Corci zimmî zimmetinde vezn ve fiyatı beynimizde ma‘lûm hamr semeninden alacak hakkım olan dört yüz yirmi dokuz guruşun dört yüz dört guruşunu yedinden ba‘de’l-ahz bâkī kalan yirmi beş guruşu bana vermemeğin taleb ederim deyü da‘vâ ettikde ol dahi cevâbında ber-vech-i muharrer ikrâr lâkin meblağ-ı bâkī-i mezkûr yirmi beş guruşu dahi tamamen edâ ve teslîm etmişidim deyü ba‘de’d-def‘ ve’l-inkâr dâfi‘-i mesfûr Corci zimmî def‘-i mezkûruna ikāmet-i beyyine edemeyip bi’t-taleb müdde‘î-i mersûm Yamandi zimmî ba‘de’t-tahlîfü’ş-şer‘î mûcebince meblağ-ı bâkī-i mezkûr yirmi beş guruşu müdde‘î-i mesfûr Yamandi zimmîye edâ ve teslîme mersûm Corci zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 16 Ca sene [1]221.