Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 200 Hüküm no: 251 Orijinal metin no: [23a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa Silahşörü Hacı Ahmed Ağa’nın satın aldıktan sonra hastalıklı olduğu anlaşılan cariye için Esirci Mehmed Salih’e ödediği paranın kendisine iadesi Silahşorân-ı hâssadan derûn-ı arzuhâlde mezkûrü’l-ism el-Hâc Ahmed Ağa b. Abdullah b. Abdurrahman tarafından husûs-ı âti’z-zikrde vekîl olduğu Bostanî Zenci Mehmed b. Mehmed Salih ve Hüseyin Beşe b. el-Hâc Ahmed şehâdetleriyle sâbit olan mu‘arrefetü’z-zât Hadice Hatun bt. Hasan nâm hatun Galata Bâb Mahkemesi’nde meclis-i şer‘de sâhib-i arzuhâl Esirci Mehmed Salih Beşe b. Murtaza nâm kimesne muvâcehesinde mezbûr Mehmed Salih Beşe târih-i i‘lâmdan bir ay mukaddem işbu hâzıratü bi’l-meclis orta boylu kara kaşlı Çerkesiyyetü’l-asl Müslimetü’l-millet bir re’s câriyesini cemî‘ uyûbdan sâlime olmak üzere sekiz yüz guruşa müvekkilim mezbûra bey‘ ve teslîm ol dahi ber-vech-i muharrer iştirâ ve tesellüm ve kabûl eyledikden sonra semen-i mezkûrun beş yüz elli guruşunu müvekkilim mezbûr el-Hâc Ahmed Ağa mezbûr Mehmed Salih Beşe’ye teslîm etmişidim hâlâ câriye-i mezkûrenin inde’t-tüccâr noksan-ı semen îcâb eder uyûbdan sol kulağından cerâhat seyelân edip alîle ve illet-i mezkûre kadîm olmağla müvekkilim mezbûr câriye-i mezkûreyi illet-i kadîme-i mezkûresine muttalî‘ olduğu anda istihdâm etmeyip ve bir tarîkle kabûlünü müş‘ir müvekkilim mezbûrdan nesne sâdır olmamağla câriye-i mezbûreyi bâyi‘-i mezbûra ve redd-i semen olmak üzere müvekkile-i mezbûreden makbûzu olan beş yüz elli guruşu alıverilmek matlûbumdur deyü bi’l-vekâle da‘vâ eyledikde evvelâ teveccüh-i husûmet için bu makūle illeti teşhîse bâ-berât-ı âlîşân ehl-i hibre ta‘yîn olunan etibbâdan Halil b. İbrahim ve İbrahim b. Mustafa efendilere câriye-i mezbûre irâet olundukda onlar dahi ba‘de’n-nazar illet-i mezkûre câriye-i mezkûreden kadîm olduğunu mezbûr Mehmed Salih Beşe muvâcehesinde herbiri haber vermeleriyle mûcebince zikrolunan câriye-i mezkûreyi müvekkil-i mezbûr el-Hâc Ahmed Ağa yedinden ahz-birle makbûzu olan meblağ-ı mezkûr beş yüz elli guruşu müvekkil-i mezbûr el-Hâc Ahmed Ağa için müvekkile-i mezbûre Hadice Hatun’a edâ ve teslîme mezbûr Mehmed Salih Beşe’ye tenbîh olunduğu bi’[l]-iltimâs huzûr-ı âlîlerine [i‘lâm olundu.] Fî 15 Ca sene [1]221.