Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 201 Hüküm no: 252 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ahmed Ağa Vakfı’nın tevliyet hakkının eşit olarak Nesibe Hatun ile Mehmed Ârif’e ait olduğunun tescil olunduğu Nezâreti abd-i dâ‘îlerine meşrûta evkāfdan merhûm el-Hâc Ahmed Ağa nâm sâhibü’l-hayrın vakfeylediği menâzil ve dekâkîn vakfının galle ve tevliyeti hayâtda oldukça kendiye ve ba‘de vefâtihi evlâd-ı evlâd-ı evlâdına ba‘dehum utekāsına ve ba‘dehû zükûr ve inâsı derecede müsâvî olmak üzere evlâd-ı evlâd-ı evlâd-ı utekāsına ve ba‘de’l-inkırâz Medîne-i Münevvere -nevvarallâhu te‘âlâ ilâ-yevmi’l-âhire- fukarâsına şart ve ta‘yîn eylediği evlâd-ı utekādan olup el-yevm vakf-ı mezbûrun mütevelliyesi olan derûn-ı arzuhâlde ismi mezkûre Nesîbe Hatun’un yedinde olan vakfiye-i ma‘mûlün-bihâsı mefhûmundan ve ber-vech-i âtî tarafeynin ikrâr ve tasâdduklarından zâhir ve müstebân oldukdan sonra evlâd-ı utekā-yı vâkıf-ı mezbûrdan sâhib-i arzuhâl Mehmed Ârif b. Mehmed Ali mahrûse-i Galata’da mahfil-i kazâda zâtı mu‘arrefe mezbûre Nesîbe bt. Yusuf nâm hatun muvâcehesinde vakf-ı mezbûrun galle ve tevliyetine ber-mûceb-i şart-ı vâkıf ve ber-mantûk-ı vakfiye-i ma‘mûlün-bihâ evlâd-ı utekādan büyükbabam el-Hâc Hasan b. Mehmed mutasarrıf iken vefât eyledikde nevbet-i tasarruf sulbî kebîr oğlu babam mezbûr Mehmed Ali ile sulbiye kebîre kızı mezbûre Nesîbe Hatun’un vâlidesi Ümmügülsüm Hatun’a âid olup mezbûrân dahi ale’l-iştirâki’s-seviyy ber-vech-i meşrûta tevliyet-i mezkûreye mutasarrıflar iken müte‘âkiben vefât edip bu vechile nevbet-i tasarruf benimle mezbûre Nesîbe Hatun’a ale’l-iştirâki’s-seviyy âid ve râci‘ olmuş iken vakf-ı mezbûrun galle ve tevliyetini mezbûre Nesîbe Hatun müstakilleten zabt u tasarruf etmekle ber-vech-i meşrûta seviyyen tasarruf matlûbumdur deyü da‘vâ eyledikde mezbûre Nesîbe Hatun dahi cevâbında husûs-ı mezkûru ve mazmûn-ı vakfiye-i mezkûreyi ber-vech-i tafsîl bi-tamâmihâ tâyi‘aten ikrâr u i‘tirâf etmeğin alâ-mûcibi ikrârihâ mezbûre Nesîbe Hatun merkūm Mehmed Ârif ile vakf-ı mezbûrun galle ve tevliyetine şerîk olup ber-mûceb-i şart-ı vâkıf ber-vech-i münâsafa seviyyen zabt u tasarrufları iktizâ eylediği tescîl ve mübâşirleri Ali Çavuş kulları yediyle bi’l-iltimâs huzûr-ı âlîlerine i‘lâm olundu. Fî 15 Ca sene 1221.