Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 836 Hüküm no: 1088 Orijinal metin no: [131b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlyas Ağa’nın, ölen Mehterbaşı Mustafa Ağa’nın vârisi olduğu Husûs-ı âti’l-beyânın mahallinde tahrîri iltimâs olunmağın taraf-ı şer‘-i şerîfden irsâl olunan mevlânâ İbrahim Efendi b. Şeyh Hızır umdetü’l-emâsil ve’l-akrân Atâullah Ağa b. Abdülmu‘în’in mahmiye-i İstanbul’da İshak Paşa mahallesinde vâki‘ menziline varıp zeyl-i rakīmde muharrerü’l-esâmî olan müslimîn huzûrunda akd-i meclis-i şer‘-i şerîf ettikde mahmiye-i mezbûrda Kabasakal Sinan mahallesinde sâkin iken bundan akdem vefât eden mehterbaşı Mustafa Ağa’nın veresesinden zevce-i metrûkesi umdetü’l-muhadderât Âişe Hâtun bt. Karakaş Ali Ağa zâtını ma‘rifet-i şer‘iyye ile ârifûn olan İmâm Abdurrahman Efendi b. Mahmud ve Mahmud Bey b. Bayezid ve el-Hâc Bâli Ağa b. Yakub ve Hasan Ağa b. Süleyman nâm kimesneler ta‘rîfleri ile mu‘arrefe oldukdan sonra meclis-i ma‘kūd-ı mezbûrda müteveffâ-yı mezbûrun li ebeveyn karındaşı râfi‘ü’l-kitâb İlyas Ağa b. ( ) nâm kimesne mahzarında bi’t-tav‘i’s-sâf ikrâr ve i‘tirâf edip benim babam mezbûr Karakaş Ali Ağa’nın babası İnebey ile mezbûr İlyas Ağa’nın babası Mustafa Bey’in babası Hüdâverdi li ebeveyn karındaşlar olmağla mezbûr İlyas Ağa benim babamın li ebeveyn ammi oğlunun oğlu ve usûbet-i nesebiyye cihetinden benim hasren vârisimdir, bundan gayrı vârisim yokdur dedikde mezbûr İlyas Ağa dahi mukırre-i mezbûreyi ikrâr-ı meşrûhunda bi’l-muvâcehe tasdîk ve bi’l-müşâfehe tahkīk etmeğin vâki‘ hâli mevlânâ-yı mezbûr mahallinde tahrîr, ba‘dehû ma‘an irsâl olunan Ramazan b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Es-Sâbikūn.