Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 202 Hüküm no: 255 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Ömer Çavuş’un bazı gerekçeler ileri sürerek yaptığı berber dükkanının bir miktarını yıkması talebiyle Seyyid Hacı Mustafa Çelebi aleyhine açtığı davasının haklı olmadığı Sâdır olan fermân-ı âlîlerine imtisâlen Galata Mahkemesi’nden mürsel Kâtib Şerîf Mehmed Emin Efendi dâ‘îleri hâssa mi‘mârı hulefâsından Halil Reşid Halîfe ile mahrûse-i Galata hâricinde Fermeneciler sûkunda vâki‘ cidâr-ı hısna muttasıl merhûm İlyas Çelebi Vakfı’ndan zikr-i câ’î münâza‘un-fih olan berber dükkânına varıp huzûr-ı Müslimînde akd-i meclis-i şer‘-i âlî eyledikde sâhib-i arzuhâl Kalyoncu Ömer Çavuş b. Ahmed meclis-i ma‘kūd-ı mezkûrda dükkân-ı mezkûrun bi’l-icâreteyn mutasarrıfı derûn-ı arzuhâlde ismi mezkûr Berberler Kethüdâsı es-Seyyid el-Hâc Mustafa Çelebi b. es-Seyyid el-Hâc Ahmed muvâcehesinde işbu mu‘âyene olunan dükkân-ı mezkûr fi’l-asl fevkinde bir bâb sagīr odayı müştemil dîk ve karanlık bir kıt‘a berber dükkânı iken bu esnâda mutasarrıfı mezbûr es-Seyyid el-Hâc Mustafa Çelebi dükkân-ı mezkûra ziyâ almak için fevkinde kâin odayı hedm ve külliyyen ref‘ ve yerine şirvâne binâ edip vaz‘-ı kadîmi üzere dükkân kadden yedi zirâ‘ bir kıt‘a berber dükkânı binâ etmişidi lâkin işbu dükkân-ı mezkûrun hizâsında olup cidâr-ı hısna muttasıl olan bi’l-cümle dekâkînin sakfları beşik örtüsü olduğu ecilden nâzil olan matar tarafeynden oluk ile tarîk-i âmme cereyân edegelmişiken mezbûr es-Seyyid el-Hâc Mustafa Çelebi dükkân-ı mezkûrun sakıf kemâ-fi’s-sâbık beşik örtüsü etmeyip damlasını tarîk-i âmme icrâ için sakf-ı mezkûr verâsında olan kalkanını iki zirâ‘ ziyâde terfi‘ etmekle ma‘âzallâhu te‘âlâ dükkân-ı merkūmun harîk vâki‘ olmak lâzım gelirse dükkân-ı merkūm sakfına sârik çıktığı hâlde cidâr-ı hısndan Yahûdhane-i merkūmeye duhûl edeceği bâhir ve âşikâr olmağla sakf-ı merkūmun ancak kalkanını iki zirâ‘ kat‘ ve tenzîl eylesin deyü eylediği da‘vâsı [nâ]-meşrû‘ ve bâ-emr-i âlî memnû‘ olan mevâddan olduğu kâtib-i mezbûr mahallinde tahrîr ve ma‘an mürsel ümenâ-i şer‘le meclis-i şer‘a gelip tarafeyn muvâcehelerinde alâ-vukū‘ihî [24a] inhâ ve takrîr ve müdde‘î-i mezbûr dahi kâtib-i mezbûru takrîrinde tasdîk etmeğin bu sûretde mezbûr es-Seyyid el-Hâc Mustafa Çelebi’ye şer‘an suâl teveccüh etmediği bi’l-iltimâs. Fî 19 Ca sene [1]221.