Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 204 Hüküm no: 258 Orijinal metin no: [24a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahalinin şikayeti üzerine mahallelerinden çıkarılan Yağcı Ali Yazıcı, karısı Fâtıma ve oğulları Mehmed Emin Beşe’nin tekrar mahallelerine dönmek için istida verdikleri Mahrûse-i Galata’da Yolcuzâde Mahallesi sükkânından olup herbiri hadîdü’l-lisân olmalarıyla ahâlî-i mahalle-i mezkûre ile beynlerinde münâferet vukū‘una mebnî bundan akdem bâ-i‘lâm ve bâ-fermân-ı âlî li-ecli’t-tedîb mahalle-i mezkûreden ihrâc olunan Yağcı Ali Yazıcı b. Halil ve zevcesi zâtı şer‘an mu‘arrefe Fâtıma Hatun ve oğlu Mehmed Emin Beşe mahrûse-i mezbûrede mahfil-i kazâda mahalle-i mezbûre ahâlîlerinden Mustafa Beşe b. Mehmed ve Ali Alemdâr b. Ali ve Ahmed Ağa b. Halil ve Osman Beşe b. Osman ve Mahmud Beşe b. Zekeriya ve Kahveci Ahmed Beşe b. Mehmed Salih ve İsmail Beşe b. Mustafa hâzır oldukları hâlde ve herbiri tazallüm-ı hâl ve ifâde-i mâ fi’l-bâl edip biz mahalle-i mezbûreden ihrâc olunduğumuz müddetden beri tedîb olup ba‘de’l-yevm kimesneye bilâ-mûcib te‘addî ve rencîde etmeyip kendi hâlimizde ırzımız ile mukayyed olmağa müte‘ahhidler olduk deyü cürm-i sâbıkālarını afv ve kemâ-fi’s-sâbık mahalle-i mezkûrede iskân olunmaları bâbında fermân-ı âlî sudûrunu herbiri istirhâm ve istid‘â-yı inâyet eylediklerinde ahâlî-i hâzirûn-ı mezbûrûn dahi zevcân-ı mezbûrânın ve oğulları mezbûr Mehmed Emin Beşe’nin nefslerine ve hîn-i mütâlebede meclis-i şer‘a ihzârlarına herbiri başka başka kefîl olmalarıyla bu sûretde mezbûrûnun cürm-i sâbıklarına kalem-i afv keşîde ve imlâ-birle ber-vefk-i dilhâh mahalle-i mezbûrede vâki‘ kendi menzillerinde iskân olunmak üzere istirhâm ve istid‘âlarına müsâ‘ade-i re’y-i rezîn-i âsafânelerine menût mevâddan idüğü bi’[l]-iltimâs huzûr-ı âlîlerine i‘lâm olundu. Fî 19 Ca sene [1]221.