Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 207 Hüküm no: 263 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalyoncu Süleyman ve karısı Hediye’nin yumruk ile vurarak oğullarının ölümüne sebep olduğu iddiasıyla Faideci Seyyid Feyzullah aleyhine açtıkları davada iki yüz elli guruşa sulh oldukları Kasaba-i Kasımpaşa’da Seferikoz Mahallesi’nde sâkin iken bundan akdem vefât eden es-Seyyid Mehmed Ârif nâm sagīrin babası Kalyoncu Süleyman b. Mehmed ve anası zâtı mu‘arrefe Hediye bt. Mehmed nâm zevcân Galata’da mahfil-i kazâda Fâideci es-Seyyid Feyzullah Çelebi b. Ömer nâm kimesne muvâcehesinde mezbûr es-Seyyid Feyzullah Çelebi târih-i i‘lâmdan on bir gün mukaddem Perşembe günü ba‘de’z-zuhr kasaba-i mezbûrede Hasanpaşa Hamamı önünde yumruk ile sagīr-i merkūmun başına bi-gayr-ı hak darb ve sâhib-i firâş edip darb-ı mezkûrun tesîrinden nâşî ve yedi gün mürûrunda vefât etmekle mûcib-i şer‘îsini taleb ederim deyü tasaddî eylediğimiz da‘vâmızdan bâ-vesâtet-i muslihîn mezbûr es-Seyyid Feyzullah Çelebi ile an-inkâr iki yüz elli guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ darb-ı mezkûra ve oğlumuz müteveffâ-i mezbûrun diyetine müte‘allika âmme-i de‘âvîden mezbûr es-Seyyid Feyzullah Çelebi’nin zimmetini kabûlü hâvî bi’l-verâse ba‘de’l-ibrâ ibrâdan müstesnâ bedel-i sulh-ı mezkûr 250 guruş mezbûr es-Seyyid Feyzullah Çelebi’nin zimmetinde olmağla hâlâ taleb ederim deyü bi’l-verâse da‘vâ ettiklerinde ol dahi cevâbında ber-vech-i meşrûh ikrâr u i‘tirâf etmeğin alâ-mûcibi ikrârihi bedel-i sulh-ı merkūm 250 guruşun müdde‘iyân-ı zevcân-ı mezbûrâna edâsıyla mezbûr es-Seyyid Feyzullah Çelebi ilzâm olunduğu tescîl ve bi’l-iltimâs huzûr-ı âlîlerine i‘lâm olundu. Fî 26 Ca sene [1]221.