Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 208 Hüküm no: 266 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlarını ödeyemediği için dört aydan beri hapiste olan Nikola v. Kiryazi’nin mevcut malları satılıp bedeli alacaklılar arasında paylaştırıldıktan sonra serbest bırakıldığı Diğer arzuhâl hâmişinde mastûr der-kenâr mantûkunca Hayyât Manol v. Dimitri nâm zimmîye bâ-i‘lâm-ı şer‘î mahkûmün-bih yüz elli guruş deyni tahsîl için dört ay on günden beri ser-bostâniyân-ı hâssa izzetli ağa kulları mahbesinde mahbûs olan Galata ahâlîsinden kebeci esnâfından arzuhâl eden Nikola v. Kiryazi nâm zimmî sâdır olan fermân-ı âlîlerine inkıyâden Galata Bâb Mahkemesi’nde meclis-i şer‘de ber-vech-i câ‘î mastûrü’l-esâmî dâyinleri muvâcehesinde takrîr-i kelâm ve tâ‘bir-i merâm edip benim işbu hâzirûn bi’l-meclis mersûm Manol zimmîye yüz elli guruş ve bâğçevân Vasil v. Nikola zimmîye bâ-i‘lâm-ı şer‘î iki yüz guruş ve Kürkçü Melkon v. Andon zimmîye 170 guruş ve Çukacı Aron v. Samarya Yahûdi’ye yüz yetmiş guruş ve Tuzlayıcı Hıristo v. Vasil zimmîye yedi yüz guruş ve Havyarcı Apostol v. Sutiri zimmîye iki yüz elli guruş ve Balıkçı Dimitri v. Saranda zimmîye iki yüz kırk yedi guruş ve Balıkçı Mosi zimmîye yüz guruş ve Balıkçı Kuzma zimmîye elli guruş ve Ciğerci Petlo v. Çoko’ya ba‘de’t-tenzîli’l-murâbaha üç yüz otuz guruş ve Ciğerci Piço v. Hıristo zimmîye dört yüz guruş ve Ciğerci Mitro v. Larko zimmîye doksan guruş ve Ciğerci Pano zimmîye iki yüz guruş ve Ciğerci Mitro ve Andon nâm karındaş zimmîlere beş yüz guruş ve Kebeci Panayot zimmîye altı yüz guruş ve Kebeci Yanako zimmîye yüz guruş ve Kebeci Apostol zimmîye yüz elli guruş ve Kebeci İsteryo zimmîye seksen üç guruş ve esnâf akçesinden Mütevellî Lefter zimmîye yüz altmış sekiz guruş ve Kebeci Yani zimmîye yüz guruş ve Eflaklı Yorgo zimmîye ba‘de’t-tenzîli’l-murâbaha iki yüz guruş ve Mellâh Veloyi zimmîye yüz guruş ve Kebeci Panayot zimmîye ba‘de’t-tenzîli’l-murâbaha üç yüz yetmiş guruş ve Kebeci Kamalo zimmîye iki yüz seksen guruş ve Kebeci Filip zimmîye üç yüz guruş ki min-haysü’l-mecmû‘ beş bin dokuz yüz altmış sekiz guruş cihât-ı ma‘lûmeden zimmetimde deynim olmağın hattâ düyûn-ı mezkûreden ancak meblağ-ı merkūm yüz elli guruş için müddet-i mezkûreden beri mahbûs olup lâkin ben fakīr olmamla mahrûse-i Galata hısnı ebvânından Balıkpazarı Kapısı hâricinde Kebeciler sûkunda kâin ma‘lûmü’l-hudûd bir kıt‘a kebeci dükkânında mevcûd gedik tâ‘bir olunur âlât-ı lâzıme ve emvâlimden üç boy kebesi ve otuz beş aded dolama kebe ve mecmû‘u otuz dokuz zirâ‘ beş parça dikilmemiş kebe ve mecmû‘u yüz yirmi beş zirâ‘ beş top kebe ve tahmînen iki zirâ‘ parça çuka ve bir sagīr tepsiden gayrı ism-i mâl ıtlâk olunur nesnem olmayıp mu‘dim ve mu‘sir olmamla eşyâ-i mezkûre ve âlât-ı lâzıme ma‘rifet-i şer‘le âhara bey‘ ve semeni dâyinlerim mersûmûn beyninde alâ-vechi’l-guramâ tevzî‘ olunup sebîlim tahliye olunmak matlûbumdur dedikde dâyinleri mersûmûn dahi bu vechile ba‘de’t-terâzî âlât-ı mezkûre ve eşyâ-i merkūme münâdî-i hâssa ma‘rifeti ve ma‘rifet-i şer‘le lede’l-müzâyede semen-i misilleri olan iki bin iki yüz yetmiş beş guruşa bey‘ olunup ancak yetmiş beş guruşu ücret-i dellâliye ve mübâşiriye ve çukadâriye ve muhzıriye ve kaydiye olmak üzere fürûnihâde kılınıp bâkī kalan iki bin iki yüz guruşdan mecmû‘-ı düyûn-ı mezkûra olan beş bin dokuz yüz altmış sekiz guruşun beher yüz guruşuna be-hesâb-ı guramâ otuz altı guruş otuz dörder para isâbet etmekle dâyinûn-ı mersûmûndan herbiri ber-vech-i meşrûh guramâ vech üzere hisselerini meclis-i şer‘de ba‘de’l-ahz dâyinûn-ı mersûmûndan medyûn-ı mersûm Nikola zimmînin yesârına ikāmet-i beyyine edememeleriyle mersûm Nikola’nın asâranı mazbûtü’l-esâmî kimesneler ba‘de’l-ihbâr ol vechile mersûm Nikola zimmînin yesârı sâbit olmadıkça habsi meşrû‘ olmamağla habsden ıtlâk ve sebîli tahliye olunduğu huzûr-ı âlîlerine i‘lâm olundu. Fî 7 Ca sene [1]221.