Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 211 Hüküm no: 271 Orijinal metin no: [25b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Top Ustası Ali Beşe’nin kendisine itâat etmediği iddiasıyla karısı Asiye bt. İsmail aleyhine açtığı davada davalının kocasına itâatine ve mehir olarak verilen eşyasının kendisine teslimine karar verildiği Galata’ya muzâfe kasaba-i Tophane’de Firuz Ağa Mahallesi’nde sâkin Top Ustası Ali Beşe b. Mehmed nâm kimesne Galata Bâb Mahkemesi’nde meclis-i şer‘de zâtı mu‘arrefe Asiye bt. İsmail nâm hatun muvâcehesinde mezbûre Asiye Hatun yapağı memlû iki minder ve müsta‘mel dört beledî yasdık ve iki çit mak‘ad ve bir yorgan ve bir baş yasdığı ve bir döşek ve bir tencere ma‘a kapak ve bir tas ve iki sahan bâ-kapak ve bir tâbe mehr-i mu‘accel ve elli beş guruş mehr-i müeccel tesmiyesiyle zevce-i medhûlün-bihâm olup lâkin bana itâ‘at ve inkıyâddan ibâ vü imtinâ‘ etmekle suâl olunup itâate tenbîh olunmak matlûbumdur deyü da‘vâ ve zevce-i mezbûre dahi cevâbında ber-vech-i meşrûh hîn-i akidden mu‘accel tesmiye olunan eşyâ-yı muharrere-i mezkûreyi bana teslîm etmemekle ber-vech-i meşrûh bana teslîme zevcim mezbûra tenbîh olmak matlûbumdur deyü da‘vâ ve herbiri âharın müdde‘âsını ikrâr u i‘tirâf etmekle alâ-mûcibi ikrârihîmâ hîn-i akidde zevc-i mezbûrun yedinde olup mu‘accel tesmiye olunan eşyâ-i mezkûrenin vasatlarını veyâhud ber-nehc-i şer‘î vasatlarının kıymetlerini zevcesi mezbûreye teslîme zevc-i mezbûra ve zevce-i mezbûre dahi ba‘de’t-tesellüm zevci merkūma itâ‘at ve inkıyâda zevce-i mezbûreden herbirine tenbîh olunduğu bi’[l]-iltimâs huzûr-ı âlîlerine i‘lâm olundu. Fî 20 Ca sene [1]221.