Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 214 Hüküm no: 277 Orijinal metin no: [26a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Demirci Mehmed Beşe’nin yirmi dokuz sene önce ölen babasının terekesiyle alakalı annesi Hatice bt. Mehmed aleyhine açtığı miras davasının meşru olmadığı Derûn-ı arzuhâlde mezkûrü’l-ism Demirci Mehmed Beşe b. Ali nâm kimesne Galata Bâb Mahkemesi’nde meclis-i şer‘de vâlidesi sâhibe-i arzuhâl mu‘arrefetü’z-zât Hadice bt. Mehmed nâm hatun muvâcehesinde Galata’da Emekyemez Mahallesi’nde vâki‘ iki tarafdan vâlidem mezbûre Hadice’nin âhar menzilleri ve iki tarafdan tarîk-i âm ile mahdûde müştemilât-ı ma‘lûmeyi hâvî bir bâb mülk menzil babam mezbûr Demirci Ali b. Mehmed nâm kimesnenin müstakillen yedinde mülkü iken târih-i i‘lâmdan yirmi dokuz sene mukaddem vefât edip menzil-i mahdûd-ı mezkûr sekiz sehm i‘tibârıyla yedi sehm-i şâyi‘i bana ve bir sehm zevce-i metrûkesi vâlidem mezbûre Hadice Hatun’a mevrûs olmuş iken vâlidem mezbûre menzil-i mahdûd-ı mezkûru yirmi dokuz seneden beri şirâen mülkü olmak üzere müstakilleten zabt u tasarruf etmekle yedi sehm hissemden kasr-ı yedine tenbîh olunmak matlûbumdur deyü da‘vâ ettikde ol dahi cevâbında menzil-i mezkûra şirâen mülkü olmak üzere müstakillen vaz‘-ı yedini ikrâr müteveffâ-i mezbûrun mülkü olduğunu inkârından mâ‘adâ müdde‘î-i mezbûr Mehmed Beşe fevt-i mezkûreden beri vâlidesi mezbûre Hadice Hatun ile bir beldede sâkinler olup bu müddetde bilâ-özr-i şer‘î sükūt ve terk-i da‘vâ eylediğini mukırr u mu‘terif olmağla bu makūle bilâ-özr-i şer‘î terk olunan da‘vânın bilâ-emr-i âlî istimâ‘ı memnû‘ olmağın müdde‘î-i mezbûr bilâ-emr-i âlî da‘vâ-yı mezkûresiyle vâlidesi mezbûre Hadice Hatun’a bî-vech mu‘ârazadan men‘ olunduğu mübâşirleri es-Seyyid Mustafa Çavuş kulları [yediyle] huzûr-ı âlîlerine i‘lâm olundu. Fî 29 Ca sene [1]221.