Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 215 Hüküm no: 278 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Kuluhan v. Hican’ın karz ve hamr bedelinden Kostantin v. Pandeli’den seksen dört guruş otuz para alacağı olduğu Galata’da mütemekkin Şerbetçi Kuluhan v. Hican Galata’da mahfil-i kazâda Kostantin v. Pandeli zimmî muvâcehesinde mersûm Kostantin zimmî zimmetinde cihet-i karzdan altmış üç guruş otuz para ve hamr semeninden yirmi bir guruş ki cem‘an seksen dört guruş otuz üç para alacak hakkım olmağla hâlâ taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin meblağ-ı mezkûr seksen dört guruş otuz parayı kendiye tamamen def‘ u teslîm etmişidim deyü ba‘de’d-def‘ ve’l-inkâr dâfi‘-i mersûm def‘-i mezkûruna ikāmet-i beyyine edemeyip bi’t-taleb müdde‘î-i mersûm Kuluhan zimmî ba‘de’t-tahlîfü’ş-şer‘î mûcebince meblağ-ı mezkûr seksen dört guruş otuz parayı müdde‘î-i mersûma edâ ve teslîme mersûm Kostantin zimmîye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 3 C sene [1]221.