Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 837 Hüküm no: 1090 Orijinal metin no: [131b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Mehmed’in, Mehmed Beşe b. Mustafa’ya sattığı câriye bahasından alacağını, kefil Sâliha bt. Abdullah’tan talep ettiği Mahmiye-i İstanbul’da Ali Paşa mahallesinde sâkin işbu bâ‘isü’l-kitâb Ali Beşe b. Mehmed nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de Sâliha bt. Abdullah nâm hâtun mahzarında üzerine da‘vâ ve takrîr-i kelâm edip bundan akdem gāib ani’l-meclis Mehmed Beşe b. Mustafa nâm kimesneye evsâfı beynimizde ma‘lûm Rûsiyyetü’l-asl Kalender bt. Abdullah nâm câriye-i memlûkemi yüz otuz esedî guruşa bey‘ ve teslîm ol dahi iştirâ ve kabz ve tesellüm eyledikden sonra semeni olan meblağ-ı mezbûra mezbûre Sâliha Hâtun emr [ve] kabûlü hâviye kefâlet-i sahîha-i şer‘iyye ile kefîl olmağın meblağ-ı mezbûrun mukaddemâ seksen esedî guruşunu mezbûr Mehmed Beşe yedinden ahz u kabz ve bâkī kalan elli esedî guruşu mezbûre Sâliha Hâtun’dan kefâletine binâen taleb ederim, suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ merkūm Mehmed Beşe zimmetinde beynlerinde ma‘lûm câriye bahâsından hakkı olan meblağ-ı mezbûr yüz otuz guruşa emr [ve] kabûlü hâviye kefâlet-i sahîha-i şer‘iyye ile kefîl olmadığına mezbûre Sâliha Hâtun’a yemîn teklîf olundukda yemînden nükûl etmeğin mûcebince meblağ-ı mezbûr elli esedî guruşu müdde‘î-i mezbûra edâya mezbûre Sâliha Hâtun’a tenbîh olundukdan sonra mezbûr Ali Beşe meclis-i mezbûrda Sâliha Hâtun muvâcehesinde i‘âde-i kelâm edip meblağ-ı mezbûrun bir esedî guruşunu mezbûre Sâliha Hâtun yedinden alıp bâkī kırk dokuz esedî [guruşu] târih-i kitâbdan otuz gün tamâmına değin te’cîl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Yusuf Çavuş el-Mübâşir, İbrahim Çelebi b. Ahmed, Hasan Çelebi b. Ahmed, Veli b. Mehmed.