Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 838 Hüküm no: 1091 Orijinal metin no: [131b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Abdullah’ın, Yusuf b. Abdullah’a açtığı hırsızlık davasını ispat edemediği Mahmiye-i İstanbul’da vâki‘ merhûm el-Hâc Hasan medresesi’nde sâkin Ahmed b. Abdullah nâm kimesne meclis-i şer‘-i hatîrde işbu hâzır bi’l-meclis el-Hâc Ahmed b. Mehmed nâm kimesnenin abd-i mu‘takı Yusuf b. Abdullah mahzarında üzerine da‘vâ ve takrîr-i kelâm edip târih-i kitâb senesi Şa‘bân’ın yirmi sekizinci gecesi merkūm Yusuf zikr olunan medresede sâkin olduğum odanın ben yoğiken kilidini kırıp içeriye girip üç aded mukaffel sepet sandığın içinde dört yüz yetmiş esedî guruş ve iki yüz yirmi esedî guruş mukābelesinde yedimde rehin olan bir sîm kılıç ve iki sîm maşraba ve seksen miskāl beş aded altın bilezik ve bir balık dişi kabzalı sîm hançer ve kendi eşyâ-i memlûkem olan bir benefşe çuka kontoşu ve bir benefşe sâye çuka serhaddi ve bir yeşil kaftan ve bir burucî alaca kaftan ve bir al hâre entari ve dört cedîd keten bezi gömlek ve dört don ve altı münakkaş makrama ve üç beyaz bogasi zıbınımı sepetleri ma‘an ahz eylemişdir, suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine için istimhâl [132a] edip mehl-i şer‘î ile imhâl olundukdan sonra ityân-ı beyyineye kādir olmayıp ve merkūm Yusuf’a yemîn dahi vermemeğin müdde‘î-i merkūm Ahmed bî-vech mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Fahrü’l-müderrisîn Ahmed Efendi, Veli Efendi b. Müstecâb Hasan Çelebi b. el-Mütevellî, Abdullah Çelebi b. Mehmed Çelebi, İdris Çavuş [b. ] Mustafa.