Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 221 Hüküm no: 293 Orijinal metin no: [27b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed’in karzdan kaynatası Hacı Abdullah’tan kırk sekiz guruş alacağı olduğu Galata’da sâkin es-Seyyid Mehmed b. es-Seyyid el-Hâc Ahmed nâm kimesne Galata Bâb Mahkemesi’nde meclis-i şer‘de kayınatası el-Hâc Abdullah b. Ali nâm kimesne muvâcehesinde mezbûr el-Hâc Abdullah zimmetinde cihet-i karzdan kırk sekiz guruş alacak hakkım olmağla hâlâ taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin benim dahi damadım mezbûr zimmetinde cihet-i mezkûreden altmış guruş alacağım olmağla makbûzum olan meblağ-ı merkūm kırk sekiz guruş alacağım olan altmış guruşun ol mikdârına mahsûben fürûnihâde kılınıp bâkī olan [on] iki guruşu taleb ederim deyü eylediği altmış guruş karz müdde‘âsına ikāmet-i beyyineden izhâr-ı acz-birle bi’t-taleb damadı mezbûr es-Seyyid Mehmed ba‘de’t-tahlîfü’ş-şer‘î mûcebince mezbûr el-Hâc Abdullah da‘vâ-yı mezkûresiyle damadı mezbûr es-Seyyid Mehmed’e bilâ-beyyine mu‘ârazadan ba‘de’l-men‘ ikrârıyla lâzım gelen kırk sekiz guruşu damadı müdde‘î-i mezbûr es-Seyyid Mehmed’e edâsıyla mezbûr el-Hâc Abdullah ilzâm olunduğu huzûr-ı âlîlerine i‘lâm olundu. Fî 9 C sene [1]221.