Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 838 Hüküm no: 1092 Orijinal metin no: [132a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Mehmed’in ev hissesini Ali Bey b. Hüsameddin’e sattığı Mahmiye-i İstanbul’da Çıkrıkçı Kemal mahallesi sükkânından olup sâbıkan Trablus kadısı olan umdetü’l-mevâli’l-izâm muhtârî Mustafa Efendi b. Mehmed tarafından husûs-ı âti’l-beyâna vekîl olduğu Ali Bey b. Süleyman ve diğer Ali Bey b. Mehmed nâm kimesneler şehâdetleri ile şer‘an sâbit olan Abdürrezzak Çelebi b. Abdi nâm kimesne meclis-i şer‘-i hatîrde işbu râfi‘ü’l-kitâb Ali Bey b. Hüsameddin nâm kimesne mahzarında bi’l-vekâle ikrâr ve takrîr-i kelâm edip vilâyet-i Anadolu’da kasaba-i Kite’de vâki‘ bir tarafdan Baba Hasan oğlu Mehmed mülkü ve üç tarafdan tarîk-i âm ile mahdûd bir bâb fevkānî oda ve iki bâb tahtânî oda ve bir samanlık ve bahçe ve bir fırın ve bir su kuyusunu müştemil çiftlik ta‘bîr olunur menzil ve iki bin on altı sehim olup sihâm-ı mezbûrenin bin beş yüz yedi sehmi mezbûr Ali Bey’in ve beş yüz dokuz sehmi müvekkilim mûmâ-ileyh Mustafa Efendi’nin mülkü olmağla hâlâ müvekkilim mûmâ-ileyh Mustafa Efendi menzil-i mezbûrda olan beş yüz dokuz sehim hissesini merkūm Ali Çelebi’ye elli esedî guruşa bey‘ edip ol dahi vech-i meşrûh üzre iştirâ ve kabûl eyledikden sonra semeni olan meblağ-ı mezbûr elli esedî guruşu meclis-i şer‘de merkūm Ali Bey yedinden bi’l-vekâle ahz u kabz edip mahallinde zabt ve tasarrufa bi’l-vekâle mezbûru taslît eyledim, min ba‘d menzil-i mezbûrda müvekkil-i mûmâ-ileyhin alâka ve medhali kalmamışdır dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Hasan Ağa b. Mustafa, Ali Çelebi b. ( ) Vanzârî, Mehmed Çelebi b. ( ) Bevvâb-ı sultânî, Hacı Hüseyin, Karaböcek, Mehmed b. ( ), el-Hâc İsmail b. ( ), diğer el-Hâc İsmail Efendi, Mehmed b. Ramazan.