Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 222 Hüküm no: 295 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Mehmed ile eski kocası Debbağ Hacı İbrahim’in evlilik hukukuyla ilgili birbirlerinin zimmetlerini ibra ettikleri Galata’ya muzâfe kasaba-i Kasımpaşa’da Çatma Mescid Mahallesi’nde sâkine sâhibe-i arzuhâl mu‘arrefetü’z-zât Emine bt. Mehmed nâm hatun Galata Bâb Mahkemesi’nde meclis-i şer‘de zevc-i muhâlı‘ı derûn-ı arzuhâlde mezkûrü’l-ism Debbâğ el-Hâc İbrahim Ağa b. el-Hâc Mehmed nâm kimesne muvâcehesinde mezbûr el-Hâc İbrahim Ağa zevc-i dâhilim olup lâkin beynimizde hüsn-i mu‘âşeretimiz olmamağla ben ber-vech-i âtî hul‘a tâlibe ve râgibe olduğum ecilden mezbûrun zimmetinde mütekarrir ve ma‘kūdun-aleyh elli beş guruş mehr-i müeccelim ile nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr el-Hâc İbrahim Ağa ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-ı mezkûru ba‘de’l-kabûl ancak hukūk-ı zevciyyete müte‘allika da‘vâdan herbirimiz âharın zimmetini ibrâ ve iskāt ve herbirimiz ber-vech-i muharrer âharın ibrâsını kabûl eyledik deyü ikrâr ve tasdîkleri tescîl ve mübâşirleri el-Hâc Üveys Çavuş kulları yediyle huzûr-ı âlîlerine i‘lâm olundu. Fî 9 C sene [1]221.