Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 223 Hüküm no: 297 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giritli Hacı Hasan Ağa’ya kiracısı olduğu vakıf balıkhanenin tamirine izin verildiği Ashâb-ı hayrâtdan merhûm İbrahim Paşa Vakfı müstegallâtından mahrûse-i Galata hısnı ebvâbından Eski Yağ Kapanı İskelesi’nde leb-i deryâda kâin ma‘lûmü’l-hudûd ve’l-müştemilât bir bâb atîk balıkhânenin bi’l-icâreteyn mutasarrıfı Giridî el-Hâc Hasan Ağa b. Abdullah b. Abdurrahman tarafından husûs-ı âtîde vekâleti es-Seyyid İbrahim Edhem b. Mustafa ve Mahmud Ağa b. Mustafa ihbârlarıyla zâhir olan Ağa b. Mehmed mahrûse-i mezbûre Bâb Mahkemesi’nde meclis-i şer‘-i kavîmde vakf-ı müşârun-ileyhin kâtib ve câbîsi Abdullah Efendi b. Mehmed Ali hâzır olduğu hâlde bi’l-vekâle takrîr-i kelâm edip balıkhâne-i merkūma mürûr-ı zamân ile müşrif-i harâb ve mâil-i türâb olup el-yevm inhidâma müteveccih olmağla ta‘mîr ve termîm olunmaksızın alâ-hâlihî terk olunan mahâll-i merkūm mecma‘-ı nâs olan iskele olduğuna binâen hatar ve mahzurdan sâlim olmadığından başka ta‘mîr ve termîmi cânib-i vakf-ı şerîfe nâfi‘ olmağın müvekkilim mezbûr dahi balıkhâne-i merkūmeyi terfî‘ ve tevsî‘ etmeksizin hey’et-i asliyyesi üzere ta‘mîr ve termîme ta‘ahhüd-i tâm eyledi dediğini câbî-i vakf-ı mezbûr tasdîk edip ebniye husûsuna dâir bundan mukaddemce şeref-rîz-i sudûr eden fermân-ı âlîye mugāyir olmayarak kimesneye zarar-ı şer‘îsi olmaksızın balıkhâne-i merkūmenin hey’et-i asliyyesi üzere ta‘mîr ve termîmine izin ve ruhsatı hâvî fermân-ı âlîlerine i‘lâm olundu. Fî 11 C sene [1]221.