Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 839 Hüküm no: 1093 Orijinal metin no: [132a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Halil’in terekesinden hisselerin vârislerine dağıtıldığı Mahmiye-i İstanbul’da Elvanzâde mahallesinde sâkin iken bundan akdem vefât eden Mehmed b. Halil’in verâseti zevce-i metrûkesi Zamâne bt. Abdullah nâm odalığından tevellüd eden sulbî sagīr oğlu Musa’ya ve âhar odalığı Üftâde bt. Abdullah’dan tevellüd eden sulbiye sagīre kızı Sâliha’ya münhasıra olup li eb karındaşı sagīr-i mezbûr Musa’ya ba‘dehû mezbûr Musa dahi fevt edip verâseti ancak vâlidesi Belkıs’a münhasıra olduğu şer‘an zâhir ve mütehakkik oldukdan sonra merkūme Belkıs meclis-i şer‘de sagīrân-ı mezbûrânın hayâtlarında tesviye-i umûrlarına kıbel-i şer‘den mansûb vasîleri olan bâ‘isü’l-kitâb Hüseyin Beşe b. Hasan mahzarında bi tav‘ihâ ikrâr ve i‘tirâf edip mezbûr Hüseyin Beşe’nin makbûzu olup mezbûr Musa’ya babası müteveffâ-yı merkūm Mehmed’in terekesinden bi’l-irsi’ş-şer‘î defter-i kassâm mûcebince isâbet eden dört yüz iki buçuk esedî guruşu ve kız karındaşı müteveffât-ı merkūme Sâliha’dan kezâlik ber mûceb-i defter-i kassâm isâbet eden yüz on beş buçuk esedî guruşu cem‘an beş yüz on sekiz esedî guruşu verâsetim hasebiyle merkūm Hüseyin Beşe yedinden tamâmen ahz u kabz eyledim, min ba‘d meblağ-ı mezbûrdan vasiyy-i mezbûr Hüseyin Beşe yedinde bir akçe ve bir habbe kalmamışdır dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min Şevvâli’l-mükerrem li sene seb‘a ve seb‘în ve elf. Şuhûdü’l-hâl: Receb Çelebi [b.] Mehmed, Mehmed b. Hüsameddin, Bayram Beşe b. Mustafa, Abdullah b. Abdullah, Halil b. İbrahim, Ali b. ( ) el-Attâr, Mustafa Beşe er-Râcil.