Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 234 Hüküm no: 316 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arabsunlu İstefan’ın kızı Magdisni’yi nişanlısı Sarafim v. İstefan ile evlendirmekten vazgeçtiği ve kızının başka birisiyle evlenmesine izin istediği Vilâyet-i Anadolu’da Arabsun kazâsına tâbi‘ Sineson karyesi ahâlîsinden mahrûse-i Galata’da tuzlayıcı esnâfından arzuhâl eden İstefan v. Koti nâm zimmî Galata Bâb Mahkemesi’nde meclis-i şer‘-i kavîmde karye-i merkūme ahâlîsinden derûn-ı arzuhâlde mesfûru’l-ism Sarafim v. İstefan nâm zimmî muvâcehesinde sadriye kızım olup karye-i merkūmede mütemekkine Mağdisni nâm Nasrâniye’yi mersûm Sarafim zimmîye bundan akdem nişan tâ‘bir olunur nâmzed eylediğimden sonra mersûm Sarafim zimmî karye-i merkūmeyi terk ve Âsitâne-i aliyye’de meks ve envâ‘-ı emrâz ve ilele mübtelâ olup kızım mersûme ile beynlerinde akd ve tezvîc dahi bulunmadığına binâen ben kızım mersûmeyi mersûm Sarafim zimmîye tezvîcden fâriğ ve tâlib-i âharına tezvîce ta‘ahhüd eyledim deyü mersûm İstefan zimmînin sâdır olan takrîrini mesfûr Sarafim zimmî ile ahâlî-i karye-i merkūmeden el-Hâc Yusuf b. Abdullah ve İbrahim b. Mehmed ve Yani v. Zaharya ve Anaştas v. Manol ve Bretomos v. Kalenderi ve Polihoron v. Foti ba‘de’t-tasdîk mersûm Sarafim zimmî Nasrâniye-i mersûme ile beynlerinde akd bulunmadığını mukırr u mu‘terif olup ancak nâmzed olunduğuna binâen âhara tezvîci husûsunda mümâna‘at ve ısrâr etmekle bî-vech-i şer‘î mümâna‘atın def‘ini hâvî yedine fermân-ı âlî sudûrunu istirhâm eyledikleri huzûr-ı âlîlerine i‘lâm olundu. Fî 21 C sene [1]221.