Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 235 Hüküm no: 319 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Covani v. Nikola’nın kendisi adına sattığı şal bedelinden Dimitri v. Panayot’dan bin yüz guruş alacağı olduğu İzmirli Covani v. Nikola nâm zimmî Galata Bâb Mahkemesi’nde meclis-i şer‘-i kavîmde Dimitri v. Panayot nâm zimmî muvâcehesinde yedimde emvâlim olan yüz on aded Mağrib şalımı safka-i vâhide ile işbu hâzıra bi’l-meclis Rosya v. Nikola v. Pavli nâm müste’mene bin yüz guruş semen-i makbûza benim izin ve icâzetimle bey‘ ve teslîm edip semen-i mezkûr yedinde kalmağla hâlâ taleb ederim deyü müste’men-i mersûmun tasdîkiyle da‘vâ eylediğimde ol dahi husûs-ı mezkûru bi-tamâmihî tâyi‘an ve kat‘iyyen ikrâr u i‘tirâf etmeğin mûcebince meblağ-ı mezkûr bin yüz guruşun müdde‘î-i mesfûr Covani zimmîye edâsıyla mersûm Dimitri zimmî ilzâm olunduğu mübâşirleri Mehmed Emin Çavuş kulları yediyle huzûr-ı âlîlerine i‘lâm olundu. Fî 22 C sene 1221.