Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 235 Hüküm no: 320 Orijinal metin no: [30b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhzır Ebûbekir Çelebi’nin kendisine itâat etmeyen karısı Hafize bt. Mustafa’ya kocasına itâat etmesi için tembihte bulunulduğu Arzuhâl eden Muhzır Ebîbekir Çelebi b. İbrahim nâm kimesne Galata’da mahfil-i kazâda zevce-i medhûlün-bihâsı derûn-ı arzuhâlde mezkûrü’l-ism mu‘arrefetü’z-zât Hafize bt. Mustafa nâm hatun muvâcehesinde kayınpederi Tersâne kayıkçılarından mezbûr Mustafa hâzır olduğu hâlde mezbûre Hafize Hatun yüz yirmi guruş mehr-i müeccel ve mu‘accel-i müstevfâ ile zevce-i medhûlün-bihâm olup bana itâatden ibâ ve Kasımpaşa’da kayınpederim mezbûrun menzilinde nâşizeten sâkine olmağla mahmiye-i İstanbul’da Haydarpaşa Mahallesi’nde tedârük ve tehâyâ eylediğim menzilde tavattun-birle bana itâ‘at ve inkıyâda zevcem mezbûreye tenbîh olunmak murâdımdır deyü ba‘de’d-da‘vâ ve’l-ikrâr alâ-mûcibi i‘tirâfihâ ber-vech-i meşrûh zevci mezbûrun tedârük eylediği menzilde itâate zevcesi mezbûreye tenbîh olunduğu huzûr-ı âlîlerine i‘lâm olundu. Fî 22 C sene [1]221.