Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 236 Hüküm no: 322 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemankeş Karamustafapaşa Mahallesi’ndeki harap olan vakıf Yahûdhane’nin Hacı Eyüb ve Seyid Hacı Mehmed Salih tarafından tamirine izin istendiği Mahrûse-i Galata’da Kemankeş Karamustafapaşa Mahallesi ahâlîsinden ashâb-ı arzuhâl Sandıkçılar Kethüdâsı el-Hâc Hasan Ağa ve Mustafa Ağa ve İbrahim Ağa ve Abdülkerim Efendi ve Mehmed Usta ve Tuzcu Mustafa Ağa ve Tütüncü Abdullah Ağa ve Helvacı Osman Beşe ve Çilingir Mehmed Çavuş ve el-Hâc Mahmud Ağa ve el-Hâc Hasan ve Mehmed Sâdık ve sâir isimleri cerîdede mazbûta kırk neferden mütecâviz kimesneler mahrûse-i mezbûrede mahfil-i kazâda mahalle-i mezkûrede hamam kurbünde vâki‘ tuzcu ve bakkāl ve tütüncü dükkânları fevkinde kâin bir bâb vâkıf Yahudhânenin bi’l-icâreteyn mutasarrıflarından derûn-ı arzuhâlde isimleri mezkûr el-Hâc Eyüb b. el-Hâc Halil ve es-Seyyid el-Hâc Mehmed Salih b. Ali hâzır oldukları hâlde herbiri takrîr-i kelâm ve ifâde-i merâm edip hâzırân-ı mezbûrânın tasarruflarında olan mârru’z--zikr dekâkîn-i merkūme fevkinde kâin Yahudhânenin binâsı atîk ve ekser mevâzi‘i harâb olduğu ecilden meyl-i küllî ile tarîk-i âm üzerine mâil olup tedbîr ve ta‘mîr ve ıslâh olunmadığı takdîrce sükūt havfı melhûz ve hatar ve ziyân-ı azîm olacağı mukarrer olmağın mutasarrıfları mezbûrâna takaddüm ve işhâd sûretinde ifâde eylediğimizde onlar dahi Yahudhâne-i merkūmeyi ta‘mîr ve tecdîd ve ıslâh etmekde müsâmaha etmeleriyle bu sûretde emn ü rahatımız meslûb olup alâ-hâlihî terk olundukda ma‘âzallâhu te‘âlâ ale’l-gafle nehâren sükūtu zuhûr ederse mahâll-i mezkûr tarîk-i âm ve mecma‘-i nâs olan sûkdan olduğuna binâen muhâfaza mümkün olmayıp nüfûs-ı vâfire telef ve zâyi‘ olacağı bedîhî ve âşikâr olmağla mahâll-i merkūmdan mürûr u ubûr eden ibâdullâhı zarardan muhâfaza zımnında ancak dekâkîn üzerinde mevcûde mârru’z--zikr inhidâma mâil ve sükūtu muhtemel olan odaların hedmi bâbında musarrah fermân-ı âlî sudûru matlûbumuzdur deyü bi’l-muvâcehe ihbâr ve bi-ecmâ‘ihim istirhâm ve istid‘â-yı inâyet eylediklerinde ahâlî-i merkūmenin takrîr-i meşrûhları vâkı‘a mutâbık idüğü kıbel-i şer‘den mürsel ümenâ-i şer‘le bi’l-mu‘âyene tahkīk olunmağla bu sûretde ahâlî-i merkūmenin istid‘âlarına müsâ‘ade emr-i savâb idüğü ma‘lûm-ı adâletleri buyruldukda ol bâbda emir hazret-i veliyyü’l-emrindir. Fî 24 C sene [1]221.