Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 237 Hüküm no: 323 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Zisi v. Papa Corci’nin tülbent bedelinden alacağı olduğu iddiasıyla Korfulu Tâcir İsak aleyhine açtığı davada üç yüz elli guruşa sulh olduğu Mahmiye-i İstanbul’da Vâlidehanı’nda mütemekkin sâhib-i arzuhâl tüccârdan Zisi v. Papa Corci v. Yorgi tarafından husûs-ı âti’z-zikrde vekîl olduğu es-Seyyid Osman b. es-Seyyid Halil nâm kimesne ile Yani v. Kostantin zimmî şehâdetleriyle sâbit olan sarraf tâifesinden Yuvan v. Norsiz Galata’da mahfil-i kazâda derûn-ı arzuhâlde mastûrü’l-ism Korfu tüccârından İsak v. Abraham muvâcehesinde tercümânı tarafından Kapıoğlanı Petro hâzır olduğu hâlde müvekkilim işbu bir kıt‘a Efrenciyyü’l-ibâre temessük nâtık olduğu üzere mersûm Zisi zimmînin mesfûr İsak zimmetinde ma‘lûmü’l-zirâ‘ fistanlık işleme dülbend semeninden sekiz yüz altmış yedi guruş alacak hakkı olmağla bi’l-vekâle hâlâ taleb ederim deyü tasaddî eylediğim da‘vâmdan bâ-vesâtet-i muslihîn mersûm İsak ile üç yüz elli guruşa ba‘de’s-sulh ve’l-kabûl mâ‘adâ beş yüz on yedi guruşa müte‘allika da‘vâdan mesfûr İsak’ın zimmetini kabûlü hâvî bi’l-vekâle ba‘de’l-ibrâ ibrâdan müstesnâ bedel-i sulh-ı merkūm üç yüz elli guruş merkūm İsak’ın zimmetinde kalmağla hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı merkūm üç yüz elli guruşun müvekkil-i mersûm Zisi zimmî için vekîl-i mersûm Yuvan zimmîye edâsıyla mesfûr İsak ilzâm olunduğu bi’l-iltimâs [huzûr-ı âlîlerine i‘lâm olundu.] Fî 21 C sene [1]221.