Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 238 Hüküm no: 324 Orijinal metin no: [31a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Duvarcı Vasil’in yalı iskelesi tamirinden ve duvarcılık ücretinden Yorgaki v. Kostantin aleyhine açtığı alacak davasında seksen guruşa sulh olduğu Sâhib-i arzuhâl Duvarcı Vasil v. Hıristo zimmî Galata Bâb Mahkemesi’nde meclis-i şer‘de Tarabya’da mütemekkin Yorgaki v. Kostantin zimmî tarafından husûs-ı âti’z-zikri tasdîka vekîl olduğu İstavri v. Kostantin ve İskerlet v. Drako nâm zimmîler şehâdetleriyle sâbit olan Panayot v. Manol zimmî muvâcehesinde İstinye nâhiyesine tâbi‘ mârru’z--zikr Tarabya karyesinde vâki‘ müvekkil-i mersûmun mâlik olduğu ma‘lûmü’l-hudûd yalı tâ‘bir olunur menzili iskelesinin ta‘mîrine bi-şartü’r-rücû‘ emriyle mâlımdan masrafım olan yüz otuz guruş ve duvarcılık ücretinden dahi kırk guruş ki cem‘an yüz yetmiş guruş alacak hakkım olmağla hâlâ taleb ederim deyü tasaddî eylediğim da‘vâmdan bâ-vesâtet-i muslihîn müvekkil-i mersûm Yorgaki zimmî ile doksan guruş bedel-i makbûza ba‘de’s-sulh ve’l-kabûl mâ‘adâ seksen guruşa ve bedel-i sulh-ı merkūma müte‘allika da‘vâdan herbirimiz âharın zimmetini ibrâ ve iskāt ve herbirimiz ber-minvâl-i muharrer âharın ibrâsını kabûl-birle kat‘-ı münâza‘a eyledik deyü ikrâr ve tasdîkleri tescîl ve mübâşirleri Ali Çavuş kulları yediyle huzûr-ı âlîlerine i‘lâm olundu. Fî 21 C sene [1]221.