Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 240 Hüküm no: 329 Orijinal metin no: [31b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mehmed’in eşyasını gaspettikleri iddiasıyla oğlu Mehmed ile karısı Ayşe aleyhine açtığı davada iddiasını ispat edemediği Mübârek rikāb-ı kamer-tâb-ı hüsrevânîye arzuhâl takdîm eden Demirci zevcesi demekle meşhûre ve zâtı mu‘arrefe Hadice Hatun bt. Mehmed Çarşamba günü dîvân-ı ma‘delet-unvânda ba‘dehû mahrûse-i Galata Mahkemesi’nde ma‘kūd meclis-i şer‘-i münîrde derûn-ı arzuhâlde isimleri mezkûr sadrî kebîr oğlu Mehmed b. el-Hâc Ali ile mezbûr Mehmed’in zevce-i medhûlün-bihâsı kezâlik zâtı mu‘arrefe Âişe bt. Abdullah nâm Zenciye muvâcehelerinde işbu yedimde olan müfredât defteri mantûkunca mâlımdan mecmû‘u bin guruş kıymetli eşyâmı oğlum mezbûr ile gelinim Zenciye merkūme bi-gayr-ı hakkın ahz etmeleriyle mevcûd ise a‘yânını müstehlek ise ba‘de’s-sübût kıymet-i şer‘iyyelerini mezbûrândan tazmîn taleb ederim deyü da‘vâ onlar dahi külliyyen inkâr edip müdde‘iye-i merkūme ber-vech-i muharrer müdde‘âsına ikāmet-i beyyineden izhâr-ı acz edip tâlib-i tahlîf dahi olmamağla husûs-ı mezkûru müdde‘iye-i mezbûre bundan mukaddemce iki def‘a dahi mezbûrândan da‘vâ edip isbât-ı müdde‘âya kādire ve tahlîfe tâlibe olmamağla ber-muktezâ-yı şer‘ bilâ-beyyine mu‘ârazadan men‘ olunmuş olduğu zevcân-ı mezbûrân yedlerinde olan i‘lâm-ı şer‘î mefhûmundan müstebân olmağla bu sûretde bilâ-mûcib rikāb-ı müstetâbı defa‘âtle tasdî‘den tarafeynde nefsâniyet münfehim olmağın mûcebince müdde‘iye-i merkūme da‘vâ-yı mezkûresiyle bilâ-beyyine-i âdile mu‘ârazadan men‘ olunduğu tescîl ve mübâşirleri Dîvân-ı âlî çavuşlarından es-Seyyid Mustafa Çavuş kulları yediyle bi’l-iltimâs [huzûr-ı âlîlerine i‘lâm olundu.] Fî 24 C sene [1]221.