Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 241 Hüküm no: 332 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Selim Çelebi’nin kiracısı olduğu vakıf dükkanı tahliye edip mutasarrıfları Seyyid Hasan Çelebi ve ortağı Atiye Hanım’a teslimine karar verildiği Dârü’s-sa‘âdeti’ş-şerîfe ağası nezâretlerinde olan evkāfdan Ayasofya-i kebîr Vakfı musakkafâtından olup mahrûse-i Galata’da Azabkapısı kurbünde vâki‘ ma‘lûmü’l-hudûd bir kıt‘a üstübücü dükkânı 30 sehm i‘tibârıyla 25,5 sehmini üstübücü esnâfından es-Seyyid Hasan Çelebi’nin ve 4,5 sehmi mahmiye-i İstanbul’da Ketenciler başında sâkine Atiye Hanım’ın bi’l-icâreteyn tasarruflarında olup sâhibey-i arzuhâl mezbûr es-Seyyid Hasan Çelebi b. es-Seyyid Osman husûs-ı âtîde kendi nefsinden asîl ve müşteriki mezbûre Atiye Hanım bt. el-Hâc Mustafa tarafından ber-vech-i câ’î vekîl olduğu zâtını ârifân İsmail Efendi b. Mustafa ve Teberdâr Mehmed Ârif Ağa b. Abdullah şehâdetleriyle sâbit olan mezbûr es-Seyyid Hasan Çelebi Galata Bâb Mahkemesi’nde meclis-i şer‘-i münîrde esnâf-ı merkūmeden derûn-ı arzuhâlde mezkûrü’l-ism es-Seyyid Selim Çelebi b. Mehmed muvâcehesinde vakf-ı mezkûrun mütevellîsi es-Seyyid Hüseyin Efendi tarafından câbî-i vakf-ı mezbûr İsmail Efendi hâzır olduğu hâlde mezbûr es-Seyyid Selim Çelebi sâlifü’z-zikr dükkân-ı merkūmda beher şehr altmış para kirâyla aded-i şühûr beyân olunmaksızın müstecirimiz olup lâkin dükkân[ın] bize lüzûmu olmağla târih-i i‘lâm şehri gāyetine izâfetle fesh-i îcârla gāyet-i şehr-i merkūmda dükkân-ı mezbûrun tahliye ve zimmetinde müctemi‘ üç aylık şu kadar guruş icâre ile ma‘an bize teslîme mezbûr es-Seyyid Selim Çelebi’ye tenbîh olunmak bi’l-asâle ve bi’l-vekâle matlûbumdur deyü da‘vâ eyledikde ol dahi cevâbında [vech-i] muharrer üzere dükkân-ı mezkûrda müsteciren sâkin olup târih-i i‘lâm şehri gāyetine gelince üç aylık zimmetinde ol kadar guruş müctemi‘ olduğunu ikrâr u i‘tirâf edip lâkin ben üstübücü esnâfından olduğum ecilden dükkân-ı mezkûrun hâlî gediğine rağbet edip gedik i‘tibâr etmemle hurûcdan imtinâ‘ ederim demesi meşrû‘a olmadığından gayrı dükkân-ı mezkûrun gediği aklâmda mukayyed mu‘teber gediklerden olmadığını merkūm es-Seyyid Selim Çelebi mu‘terif iken kelâmına iltifât olunmayıp muktezâ-yı şerî‘at-i garrâ gāyet-i şehr-i mezkûrda dükkân-ı merkūmu tahliye ve üç aylık icâre-i merkūmesiyle ma‘an mutasarrıfları mezbûrâna hâliyeten teslîme mezbûr es-Seyyid Selim Çelebi’ye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 27 C sene [1]221.