Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 246 Hüküm no: 341 Orijinal metin no: [32b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacacı Artin v. Yoseb’in Diyarbakır alacası bedelinden David v. İsak aleyhine açtığı alacak davasında iddiasını ispat edemediği Galata’da Sultan Bayezid Mahallesi’nde mütemekkin Alacacı Artin v. Yoseb nâm zimmî Galata Bâb Mahkemesi’nde meclis-i şer‘de David v. İsak nâm Yahûdi muvâcehesinde mersûm David Yahûdi zimmetinde beher topu yirmişer guruşdan olmak üzere bundan akdem yedimden iştirâ ve kabz eylediği beş top Diyârbekir alacası semeninden cem‘an yüz guruş alacak hakkım olmağla hâlâ taleb ederim deyü ba‘de’d-da‘vâ ve’l-inkâr müdde‘î-i mersûm Artin zimmî ber-vech-i muharrer müdde‘âsına ikāmet-i beyyine edemeyip tâlib-i tahlîf dahi olmamağın mûcebince müdde‘î-i mersûm Artin zimmî da‘vâ-yı mezkûresiyle mersûm David Yahûdi’ye bilâ-beyyine mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 5 Receb sene [1]221.