Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 246 Hüküm no: 343 Orijinal metin no: [32b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Ali’nin Zeliha bt. Süleyman’dan ikrarı üzere yüz kırk guruş alacağı olduğu Galata’ya muzâfe kasaba-i Tophane’de el-Hâc Memi Mahallesi’nde sâkine ve zâtı mu‘arrefe Âişe bt. el-Hâc Ali nâm hatun Galata’da mahfil-i kazâda kezâlik zâtı mu‘arrefe Zeliha bt. Süleyman nâm hatun muvâcehesinde mezbûre Zeliha Hatun târih-i i‘lâmdan altı ay mukaddem kasaba-i mezbûrede Tamanlı Doğramacıoğlu Mustafa Beşe menzilinde yedimden ve mâlımdan istidâne ve kabz eylediği iki yüz yirmi beş guruşun kırk üç guruşunu bana teslîm edip zimmetinde bâkī kalan yüz seksen iki guruşu hâlâ taleb ederim deyü ba‘de’d-da‘vâ ve’s-suâl ol dahi cevâbında müdde‘iye-i mezbûre yedinden ve mâlından ancak yüz seksen üç guruş istikrâz ve kabz ve bâkī el-yevm yüz kırk guruş zimmetinde deyni olduğunu tâyi‘aten ve kat‘iyyeten ikrâr u i‘tirâf ziyâde kırk iki guruşu ba‘de’l-inkâr müdde‘iye-i mezbûre ziyâde-i mezkûre kırk iki guruş müdde‘âsına ikāmet-i beyyineye ba‘de’l-havâle mezbûre Zeliha Hatun’un ikrârı mûcebince meblağ-ı merkūm yüz kırk guruşun müdde‘iye-i mezbûreye edâsıyla mezbûre Zeliha Hatun ilzâm olunduğu bi’l-iltimâs huzûr-ı âlîlerine i‘lâm olundu. Fî 8 Receb sene 1221.