Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 247 Hüküm no: 344 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zenciye Ayşe’nin karzdan dört bin iki yüz elli guruş alacağı olduğu iddiasıyla eski kocası Hacı Mustafa aleyhine açtığı davada üç yüz guruş kıymetindeki on top Haleb çiçeklisi ile iki yüz elli guruşa sulh olduğu Sâhibe-i arzuhâl mu‘arrefetü’z-zât Zenciye Âişe bt. Abdullah nâm hatun Galata’da mahfil-i kazâda derûn-ı arzuhâlde mezkûrü’l-ism zevc-i sâbıkı el-Hâc Mustafa b. el-Hâc Mehmed muvâcehesinde mezbûr el-Hâc Mustafa bundan akdem elli beş guruş mehr-i müeccel tesmiyesiyle zevc-i dâhilim iken beni bin iki yüz on altı senesi Cumâdelâhiresi’nin yirmi dördüncü günü mahmiye-i İstanbul nevâhîsinden Ahî Çelebi Mahkemesinde nâibü’ş-şer‘ olan es-Seyyid Mehmed Efendi huzûrunda talâk-ı vâhid-i bâyin ile tatlîk ve mehr-i mezkûrum ile nafaka-i iddet-i ma‘lûmem için takdîr olunan on guruş ki cem‘an altmış beş guruş teslîm eyledikde ben dahi ahz ve hukūk-ı zevciyyete müte‘allika da‘vâdan zimmetini kabûlü hâvî ba‘de’l-ibrâ kasaba-i Tophane’de Firuz Ağa Mahallesi imâmı Kasabzâde el-Hâc Hâfız Ahmed Efendi akdiyle tekrar nefsimi mezbûra tezvîc ol dahi ba‘de’t-tezevvüc mahalle-i mezbûrede Çıkrıkçı es-Seyyid Mehmed Alemdâr’ın menzilinde müsteciren sâkinler ve zevciyyet beynimizde kāim iken bin iki yüz on yedi senesi Recebi’l-ferd <> on beşinci günü menzil-i merkūm derûnunda mahzar-ı şuhûdda beyâz akçe olmak üzere mezbûr el-Hâc Mustafa bâ-temessük yedimden istikrâz ve kabz eylediği dört bin iki yüz elli guruşu bana vermemekle hâlâ taleb ederim deyü da‘vâ eyledikde ol dahi cevâbında müdde‘iye-i mezbûre ol kadar guruşu mehir tesmiyesiyle mukaddemâ zevcesi olduğunu ve tatlîkini ikrâr tekrar tezevvücünü ve meblağ-ı merkūmunu istikrâz ve kabzını ve temessük-ı mezkûru külliyyen inkârdan mâ‘adâ müdde‘iye-i mezbûreyi ber-vech-i meşrûh tatlîk eylediğim tarihde hâkim-i müşârun-ileyh huzûrunda hukūk-ı zevciyyete ve bi’l-cümle hukūk-ı gayra müte‘allika âmme-i de‘âvî ve mütâlebât ve kâffe-i eymân ve muhâsamâtdan benim zimmetimi kabûlü hâvî bâ-hüccet-i şer‘iyye ibrâ ve iskāt ve ba‘dehû bin iki yüz on sekiz senesi Cumâdelûlâ’nın on ikinci günü ber-vech-i muharrer cemî‘ de‘âvîden zimmetimi ibrâ ve iskāt eylediğini mahkeme-i mezbûrede nâibü’ş-şer‘ bulunup ol tarihde müderrisînden ve ba‘dehû Havâss-ı refi‘a kazâsıyla ilzâm olunan fazîletlü Veliyüddin Efendi huzûrunda ikrâr ve ikrârı i‘lâm olunmuş idi ve bu takrîrine mazmûnları muvâfık bir kıt‘a hüccet ve bir kıt‘a i‘lâm ibrâzıyla def‘ ve da‘vâ-birle beynlerinde ba‘de vukū‘ı’l-müşâcere bâ-vesâtet-i muslihîn müdde‘iye-i mezbûre Âişe Hatun tasaddî eylediği da‘vâ-yı mezkûresinden mezbûr el-Hâc Mustafa ile mecmû‘u üç yüz guruş takvîm olunan on top Haleb çiçeklisi ile iki yüz elli guruşa ba‘de’s-sulh ve’l-kabûl ber-vech-i muharrer bedel-i sulhden başka ziyâdeye ve işbu târih-i i‘lâma <> gelince beynlerinde cereyân eden bi’l-cümle ahz u i‘tâ ve mu‘âmelât-ı şettâ ve hukūk-ı sâire-i şer‘iyyeye müte‘allika âmme-i de‘âvî ve mütâlebâtdan mezbûr el-Hâc Mustafa’nın zimmetini kabûlü hâvî şürût-ı müfsideden ârî ba‘de’l-ibrâ zikrolunan on top çiçekliyi müdde‘iye-i mezbûreye teslîm edip ol dahi meclis-i şer‘de ahz u kabz etmeğin mûcebince bedel-i sulhden bâkī iki yüz elli guruşun müdde‘iye-i mezbûreye edâsıyla mezbûr el-Hâc Mustafa ilzâm olunduğu mübâşirleri Halil Çavuş kulları yediyle huzûr-ı âlîlerine i‘lâm olundu. Fî 6 Receb sene [1]221.