Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 248 Hüküm no: 345 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Memiş Beşe’nin sekiz yüz kıymetli yağ ve mumunu zayi ettiği iddiasıyla Halil Reis aleyhine açtığı tazminat davasında iddiasını ispat edemediği Tüccârdan Memiş Beşe b. Mustafa nâm kimesne Galata Bâb Mahkemesi’nde meclis-i şer‘de sefîne reislerinden Halil Reis b. Mustafa nâm kimesne muvâcehesinde bundan akdem Bahr-ı siyah sevâhilinde vâki‘ Kili İskelesi’nde Âsitâne’ye nakl için navl-ı sefîne kavliyle mâlımdan sekiz yüz guruş kıymetli vezni beynimizde ma‘lûm yağ ve mumu ben mezbûr Halil Reis’e “râkib olduğun sefînene vaz‘ ve tahmîl eyle” deyü emr ol dahi emr-i mezkûrumun hilâfı sefîneye merbût sandalına vaz‘ ve tahmîl etmekle esna-i râhda rû-yi deryâda Sünne Boğazı önünde şiddet-i fırtınadan nâşî reîs-i mezbûrun sandalcısı gāib ani’l-meclis ismi ma‘lûmum olmayan kimesne zikrolunan yağ ve mumu sandala hiffet gelmek için deryâya ilkā ile telef ve zâyi‘ olmağla bu vechile reis-i mezbûrun hilâf-ı emrimle te‘addîsine binâen zikrolunan yağ ve mumun kıymet-i mezkûreleri olan meblağ-ı mezkûr sekiz yüz guruşu mezbûr Halil Reis’den tazmîn taleb ederim deyü ba‘de’d-da‘vâ ve’s-suâl ol dahi cevâbında müdde‘î-i mezbûr zikrolunan yağ ve mumu ücret ile sandala vaz‘ ve tahmîlini ikrâr emr-i mezkûru ba‘de’l-inkâr müdde‘î-i mezbûr ber-vech-i muharrer emr-i mezkûrunu isbâta kādir [ve] tahlîfe dahi tâlib olmamağın mûcebince müdde‘î-i mezbûr Memiş Beşe da‘vâ-yı mezkûresiyle mezbûr Halil Reis’e bilâ-beyyine mu‘ârazadan men‘ olunduğu huzûr-ı âlîlerine i‘lâm olundu. Fî 7 Receb sene [1]221.