Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 251 Hüküm no: 350 Orijinal metin no: [33b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Rika’nın Ağalu v. Kostantin aleyhine açtığı alacak davasında iddiasını ispat edemediği Derûn-ı arzuhâlde mastûr Nikola v. Rika zimmî bi’t-terâzî mahrûse-i Galata’da mahfil-i kazâda yine derûn-ı arzuhâlde ismi mersûm sefîne reislerinden Ağalu v. Kostantin zimmî muvâcehesinde mersûm Ağalu zimmî zimmetinde işbu bir kıt‘a Rûmiyyü’l-ibâre temessük mantûkunca târih-i i‘lâmdan dört sene mukaddem yedimden istikrâz ve kabz eylediği yüz guruş alacak hakkım olmağla hâlâ taleb ederim deyü da‘vâ ettikde ol dahi cevâbında külliyyen inkârınan mâ‘adâ müdde‘î-i mersûm Ağalu zimmî târih-i i‘lâm senesi Cumâdelâhire’nin on dördüncü günü mahfil-i şer‘iyyâtda cem‘-i hukūk-ı şer‘iyyeye müte‘allika âmme-i da‘vâdan benim zimmetimi ibrâ ben dahi ibrâsını kabûl etmişidim deyü mazmûnu takrîr-i meşrûhuna mutâbık bir kıt‘a i‘lâm-ı şer‘î ibrâzıyla eylediği def‘ini ve mazmûn-ı i‘lâm-ı mezkûru lede’t-tezkiye makbûlü’ş-şehâde idükleri ihbâr olunan es-Seyyid İbrahim b. Mehmed ve es-Seyyid Mehmed b. es-Seyyid Osman nâm kimesneler şehâdetleriyle müdde‘î-i mersûm Nikola zimmî da‘vâ-yı mezkûresiyle mersûm Ağalu zimmîye bî-vech-i şer‘î mu‘ârazadan men‘ olunduğu mübâşirleri el-Hâc Mehmed Çavuş kulları yediyle huzûr-ı âlîlerine i‘lâm olundu. Fî 8 Receb sene [1]221.