Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 251 Hüküm no: 351 Orijinal metin no: [33b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tâcir Osman Alemdâr’ın Kalas İskelesi’nde İstanbul’a götürmesi için Yani Reis’e teslim ettiği peynirden zayi olan dört fıçı peynirinin tazmini lazım geldiği Galata’da sâkin tüccârdan Osman Alemdâr b. Mehmed Galata Bâb Mahkemesi’nde meclis-i şer‘de sefîne reislerinden Yani Reis v. Yorgi zimmî muvâcehesinde ben bundan akdem Bahr-ı siyah’da vâki‘ Kalas İskelesi’nden Âsitâne’ye nakl için navl tâ‘bir olunur ücret kavliyle sefînesine mâlımdan vaz‘ ve tahmîl eylediğim on fıçı salamura peynirimi Âsitâne’ye götürüp altı fıçı peyniri bana teslîm mâ‘adâ dört fıçı peynirimi bana vermeyip yedinde kalmağla hâlâ taleb ederim deyü da‘vâ eyledikde ol dahi cevâbında zikrolunan dört fıçı peyniri Âsitâne’ye gelirken Klara nâm mahalde rû-yi deryâda şiddet-i fırtınadan nâşî hiffet-i sefîne için deryâya ilkā etmişidim dedikde müdde‘î-i mezbûr Osman Alemdâr reis-i merkūmu tasdîk etmeğin mûcebince zikrolunan dört fıçı peynirin hîn-i ilkāda kıymet[ini edâ] lâzım geldiği huzûr-ı âlîlerine i‘lâm olundu. Fî 8 Receb sene [1]221.