Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 252 Hüküm no: 353 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uskohi bt. Ohannes’in kira ücretinden Korfulu Nikola v. Yani’den ikrarı üzere kırk dört guruş alacağı olduğu, ziyade alacak iddiasını ispat edemediği Arzuhâl eden mu‘arrefetü’ş-şahs Uskohi bt. Ohannes Nasrâniye Galata’da mahfil-i kazâda derûn-ı arzuhâlde mersûmü’l-ism Korfulu Nikola v. Yani muvâcehesinde Kapıoğlanı Petro hâzır olduğu hâlde Galata hâricinde Hüseyin Ağa Mahallesi’nde vâki‘ bir bâb menzilimi bin iki yüz on beş senesi Rebî‘ülâhiri gāyetine gelince altı senede zimmetinde müctemi‘a bin sekiz yüz yetmiş iki guruşun bin beş yüz seksen dört guruşunu beher şehr ceste ceste bana teslîm bâkī zimmetinde kalan iki yüz seksen sekiz guruş ve işbu sene Cumâdelâhire mâhiyyeleri olan elli guruş ki min-haysü’l-mecmû‘ üç yüz kırk guruş alacak hakkımı mersûm Nikola’dan hâlâ taleb ederim deyü ba‘de’d-da‘vâ ve’s-suâl ol dahi cevâbında târih-i merkūmda menzil-i merkūmu ancak yirmi iki guruşa istîcâr ve ber-vech-i meşrûh altı senede müdde‘iye-i mersûmenin kabzını mukırre ve mu‘terife olduğu bin beş yüz seksen dört guruş teslîminde mersûmeyi tasdîk ve Cumâdelûlâ ve Cumâdelâhire mâhiyyelerinden ancak kırk dört guruş Nasrâniye-i mersûmeye deyni olduğunu ikrâr ziyâdeyi ba‘de’l-inkâr müdde‘iye-i mersûme ziyâde müdde‘âsına ikāmet-i beyyine edemeyip bi’t-taleb mersûm Nikola bi’l-muvâcehe tahlîf olunmağın mûcebince müdde‘iye-i mersûme ziyâde iki yüz doksan altı guruş müdde‘âsıyla mersûm Nikola’ya bilâ-beyyine mu‘ârazadan ba‘de’l-men‘ mersûm Nikola’nın ikrârı mertebesi sâlifü’l-beyân kırk dört guruşu Nasrâniye-i mersûmeye edâya mersûm Nikola’ya tenbîh olunduğu bi’[l]-iltimâs mübâşirleri Halil Çavuş kulları yediyle huzûr-ı âlîlerine i‘lâm olundu. Fî 3 Receb sene [1]221.