Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 253 Hüküm no: 355 Orijinal metin no: [34a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Hacı Mustafa’nın han kirasından Anaştaş v. Simyon’dan yüz yirmi sekiz guruş alacağı olduğu Kasaba-i Beşiktaş’da Sinan Paşa Mahallesi’nde sâkine Hadice bt. el-Hâc Mustafa b. Abdullah’ın damadı ve tarafından husûs-ı âtîde vekîl olduğu zât-ı mezbûreyi bi’l-mu‘arrefeti’ş-şer‘iyye ârifân es-Seyyid Mehmed Bey [b.] Ömer ve Ahmed b. Ali nâm kimesneler şehâdetleriyle sâbit olan Tütüncü es-Seyyid İbrahim Çelebi b. es-Seyyid Hüseyin Galata’da mahfil-i kazâda Anaştaş v. Simyon zimmî muvâcehesinde müvekkile-i mezbûrenin mahalle-i merkūmede vâki‘ köprü kurbünde kâin ahşâbdan yedi odayı hâvî bir kıt‘a hanını bin iki yüz on dokuz senesi Muharremi gurresinden Zilhiccesi gāyetine gelince bir seneliğini dört yüz guruşa mesfûr Anaştaş zimmîye îcâr ve teslîm ol dahi istîcâr ve kabûl eyledikden sonra ücret-i merkūmenin iki yüz yetmiş iki guruşunu ceste ceste bana teslîm bâkī yüz yirmi sekiz guruşu zimmetinde kalmağla bi’l-vekâle taleb ederim deyü da‘vâ eyledikde ol dahi cevâbında ber-vech-i muharrer ikrâr lâkin müdde‘î-i mezbûrun kabzını mu‘terif olduğu iki yüz yetmiş iki guruşdan başka yüz on sekiz guruş dahi müdde‘î-i vekîl-i mezbûra teslîm etmişidim deyü mikdâr-ı mezkûrda eylediği def‘ini isbâta kādir ve tahlîfe dahi tâlib olmamağın mûcebince meblağ-ı bâkī-i merkūm yüz yirmi sekiz guruş müvekkile-i mezbûre için vekîl-i mezbûr es-Seyyid İbrahim Çelebi’ye edâ ve teslîme mersûm Anaştaş zimmîye tenbîh olunduğu bi’[l]-iltimâs huzûr-ı âlîlerine i‘lâm olundu. Fî 11 Receb sene [1]221.