Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 254 Hüküm no: 356 Orijinal metin no: [34a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Francalacı hizmetkârlarından Mihal v. Yorgi’nin Kostantin’den alacağına kefaletinden dolayı Şerbetçi Angeli’den kırk guruş alacağı olduğu Francalacı hizmetkârlarından Mihal v. Yorgi nâm zimmî Galata Bâb Mahkemesi’nde meclis-i şer‘de Galata’da mütemekkin Şerbetçi Angeli v. Miho nâm zimmî muvâcehesinde benim gāib ani’l-meclis Kostantin v. Nikola nâm zimmî zimmetinde Rûmiyyü’l-ibâre işbu bir kıt‘a deyn temessüğü mantûkunca cihet-i karzdan alacak hakkım olan kırk guruşa mersûm Angeli zimmî bi’l-emr ve’l-kabûl kefîl ve zâmin olmağla meblağ-ı mezkûr kırk guruşu mersûm Angeli zimmîden bi-hükmi’l-kefâle taleb ederim deyü da‘vâ ettikde ol dahi cevâbında husûs-ı mezkûru bi-tamâmihî tâyi‘an ve kat‘iyyen ikrâr u i‘tirâf etmeğin alâ-mûcibi ikrârihi meblağ-ı mezkûr kırk guruşu müdde‘î-i mersûm Mihal zimmîye bi-hükmi’l-kefâle edâsıyla mersûm Angeli zimmî ilzâm olunduğu bi’[l]-iltimâs huzûr-ı âlîlerine i‘lâm olundu. Fî 11 Receb sene [1]221.