Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 254 Hüküm no: 357 Orijinal metin no: [34a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bartemyos v. Bedros’un alacağını havale olunan Kirkor’dan tahsilini kabul ettikten sonra tekrar İstefan v. Yorgi’den alacak iddiasında bulunmasının meşru olmadığı Berber esnâfından Bartemyos v. Bedros nâm zimmî Galata’da mahfil-i kazâda İstefan v. Yorgi nâm zimmî muvâcehesinde mersûm İstefan zimmî zimmetinde bâ-temessük cihet-i karzdan yüz altmış guruş alacak hakkım olup medyûnum mersûm İstefan zimmî deyn-i mezkûruyla beni gāib ani’l-meclis Kirkor zimmî üzerine üçümüz bir meclisde hâzır iken havâle-i mutlaka-yı sahîha-i şer‘iyye ile havâle ve herbirimiz havâle-i mezkûreyi kabûl ve meblağ-ı mezkûr yüz altmış guruşun altmış guruşunu gāib-i mersûm Kirkor zimmî yedinden bi-hükmi’l-havâle ahz etmişidim lâkin ben havâle-i mezkûreyi kabûlüme nâdim ve pişmân olmamla meblağ-ı bâkī-i mezkûr yüz guruşu mücerred mersûm İstefan zimmîden taleb ederim deyü tasaddî eylediği da‘vâsı takrîr-i meşrûhu üzere vech-i şer‘î üzere sübûtu mütehakkık olmadıkça muhîle rücû‘u meşrû‘a olmamağla kelâmına iltifât olunmadığı bi’[l]-iltimâs huzûr-ı âlîlerine i‘lâm olundu. Fî 10 Receb sene [1]221.