Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 254 Hüküm no: 358 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin aylık üçer guruştan iki yıllığına Fâtıma bt. Ali’ye kiraya verdiği küçük kızı Rukiye’yi teslim aldığı Galata’ya muzâfe kasaba-i Fındıklı’da Molla Çelebi Mahallesi’nde sâkin Mustafa Beşe b. Halil nâm kimesne Galata Bâb Mahkemesi’nde meclis-i şer‘de yine mahalle-i mezbûrede sâkine mu‘arrefetü’z-zât Fâtıma bt. Ali nâm hatun muvâcehesinde ben işbu hâzıra bi’l-meclis sulbiye sagīre kızım Rukiye’yi iki sene mukaddem beher şehr üçer guruşa mezbûre Fâtıma’ya bi’l-velâye îcâr ve icâre-i mezkûreyi sagīre-i mezbûrenin nafaka ve kisve ve sâir levâzım-ı zarûriyyesine harc u sarfa mezbûre Fâtıma Hatun’a bi’l-velâye emretmişidim ol dahi emrim üzere ol tarihden beri ve icâre-i mezkûreyi sagīre-i mezbûrenin nafaka ve kisve ve sâir levâzım-ı zarûriyyesine harc u sarf etmişidi hâlâ kızım hâzıra-i sagīre-i mezbûre Rukiye’yi işbu meclis-i şer‘de mezbûre Fâtıma Hatun bana teslîm ben dahi bi’l-velâye ahz ve tesellüm eyledim deyü ikrâr ve tasdîkleri bi’[l]-iltimâs huzûr-ı âlîlerine i‘lâm olundu. Fî 8 Receb sene [1]221.