Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 255 Hüküm no: 360 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saka Ali Beşe’nin kiracı olduğu berber dükkânını tahliye edip mutasarrıfı Andon v. Moheb’e teslim etmesine karar verildiği Galata’da Sultan Bayezid Mahallesi’nde mütemekkin Andon v. Moheb nâm zimmî Galata Bâb Mahkemesinde meclis-i şer‘de Saka Ali Beşe b. Osman nâm kimesne muvâcehesinde Berber Kethüdâsı es-Seyyid el-Hâc Mustafa Ağa hâzır olduğu hâlde Galata’da Kemankeş Karamustafapaşa Mahallesi’nde mumhâne kurbünde vâki‘ mutasarrıf olduğum bir bâb berber dükkânımda beher şehr yirmi bir guruşa müstecirim olup lâkin dükkân-ı mezkûrun bana lüzumu olmağla târih-i i‘lâm şehri gāyetine izâfetle fesh-i îcâr etmemle gāyet-i şehr-i mezkûrda dükkân-ı mezkûreden hurûc ve hâliyeten bana teslîme mezbûr Ali Beşe’ye tenbîh olunmak matlûbumdur deyü da‘vâ eyledikde ol dahi ber-vech-i muharrer ikrâr u i‘tirâf etmeğin mûcebince gāyet-i şehr-i mezkûrdan hurûc ve hâliyeten müdde‘î-i mersûm Andon zimmîye teslîme mezbûr Ali Beşe’ye tenbîh olunduğu huzûr-ı âlîlerine i‘lâm olundu. Fî 9 Receb sene [1]221.