Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 256 Hüküm no: 362 Orijinal metin no: [34b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. On dört nefer zimmî tayfanın Sefîne Kapudanı Hacı Abbas aleyhine açtıkları alacak davasında on beşer guruşa sulh oldukları Mellâh tâifesinden Nikola v. Rika ve Yani v. Dimitri ve Yorgi v. Yani ve Kostantin v. Yani ve Mihal v. Filibo ve Kostantin v. Manol ve Yorgi v. Takoldo ve Erdel v. Nikola ve diğer Yorgi v. Nikola ve İstemat v. Panos ve Vasil v. Mihal ve Françesko ve Nikola v. (…) v. Marko ve Manos v. İsterati nâm on dört nefer zimmîler Galata Bâb Mahkemesi’nde meclis-i şer‘de tüccâr sefâyini kapudanlarından el-Hâc Abbas Kapudan b. Yusuf nâm kimesne muvâcehesinde mezbûr el-Hâc Abbas Kapudan zimmetinde her[biri]mizin ücret-i mellâhiyeden otuz beşer guruş alacak hakkımız olmağla hâlâ taleb ederiz deyü tasaddî eyledikleri da‘vâlarından bâ-tavassut-ı muslihîn kapudan-ı mezbûr ile herbiri on beşer guruşa ba‘de’s-sulh ve’l-kabûl bedel-i sulh-ı mezkûrdan mâ‘adâ herbiri yirmişer guruşa müte‘allika da‘vâdan mezbûr el-Hâc Abbas Kapudân’ın zimmetini kabûlü hâvî ba‘de’l-ibrâ ibrâdan müstesnâ bedel-i sulh-ı merkūm on beşer guruş kapudan-ı mezbûrun zimmetinde kalmağla hâlâ taleb ederiz deyü ba‘de’d-da‘vâ ve’l-ikrâr alâ-mûcibi ikrârihi herbirine on beşer guruşdan cem‘an iki yüz on guruşu müdde‘ûn-ı mersûmûna edâsıyla mezbûr el-Hâc Abbas Kapudan ilzâm olunduğu bi’l-iltimâs [huzûr-ı âlîlerine i‘lâm olundu.] Fî 10 C sene [1]221.