Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 257 Hüküm no: 363 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Yorgo’nun tasarrufunda olan Tarabya’daki berber dükkanın gedik olarak kalemine kaydolunmasını istediği Mahrûse-i Galata’ya muzâfe İstinye nâhiyesine tâbi‘ Tarabya karyesinde mütemekkin berber esnâfından Petro v. Yorgo zimmî mahrûse-i mezbûrede mahfil-i kazâda esnâf-ı merkūme kethüdâsı es-Seyyid Mustafa Ağa ve yiğitbaşıları es-Seyyid Osman Çelebi ve çavuşları Molla Ali ve müsinn ü ihtiyâr ustalarından Çakar Nikola ve Bodur Agomi ve Tanaş zimmîler ile ahâlî-i karye-i merkūmeden mazbûtü’l-esamî yirmi nefer zimmîler hâzır oldukları hâlde ifâde-i merâm edip sâlifü’z-zikr Tarabya karyesinde kâin câmi‘-i şerîf kurbünde bir kıt‘a berber dükkânı derûnunda mevcûde berber gediği tâ‘bir olunur âlât-ı ma‘lûme yedimde mâlım olup dükkân-ı merkūm mâ-takaddemden beri ahâlî-i karyeye lüzûmu olan berber dükkânından olup lâkin bin iki yüz sekiz senesi tarihinde ben diyâr-ı âharda bulunduğum ecilden dükkân-ı merkūm mukaffel kalıp târih-i merkūmda bâ-fermân-ı âlî tahrîr olunan nizâm defterine idhâl olunmayıp mensiyyen terk olunmağın ol vechile dekâkîn-i sâir misillü aklâma kaydolunmamağla hakīkat-i hâl esnâfımızdan ve ahâlî-i karye-i mezbûreden ba‘de’l-istihbâr emsâli gibi kalemine kayd ve yedime sûret i‘tâ olunmak matlûbumdur deyü istid‘â ve istirhâm eyledikde berber esnâfından ve ahâlî-i merkūmundan istintak olundukda onlar dahi cevâblarında mukırr-ı mersûm Berber Petro zimmînin takrîri üzere dükkân-ı merkūm kadîm berber dükkânı olup bâ-fermân-ı âlî tahrîr hengâmında diyâr-ı âharda bulunduğu ecilden mensiyyen terk olunup deftere idhâl olunmadığını ve karye ahâlîlerinin eyyâm-ı şitâda dükkân-ı merkūma eşedd-i ihtiyâcları olup ibâdullaha lüzûmu olduğunu ba‘de’l-ihbâr bu misillü mer‘î ve mu‘teber esnâf gediğinin sonradan kaleme kayd ve sâhibi yedine sûret i‘tâ olunduğu mesbûk bi’l-misl olmağla zimmî-i merkūmun istid‘âsına müsâ‘ade-i aliyye re’y-i rezîn-i âsafânelerine menût mevâddan idüğü bi’l-iltimâs huzûr-ı âlîlerine i‘lâm olundu. Fî 9 Receb sene [1]221.