Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 260 Hüküm no: 369 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fermeneci Yorgo v. Kostantin’in karzdan Vasil v. Yani’den yüz on altı buçuk guruş alacağı olduğu Mahrûse-i Galata’da mütemekkin fermeneci esnâfından Yorgo v. Kostantin zimmî mahrûse-i mezbûrede mahfil-i kazâda esnâf-ı merkūmeden Vasil v. Yani muvâcehesinde mersûm Vasil zimmî târih-i i‘lâmdan on gün mukaddem yedimden ve mâlımdan iktirâz ve kabz eylediği yüz on altı buçuk guruş zimmetinde alacak hakkım olmağla hâlâ taleb ederim deyü ba‘de’d-da‘vâ ve’s-suâl ol dahi cevâbında ber-vech-i muharrer ikrâr u i‘tirâf lâkin meblağ-ı merkūmu târih-i i‘lâmdan üç gün mukaddem müdde‘î-i mersûm Yorgo zimmîye tamamen edâ ve teslîm etmişidim deyü eylediği def‘ini müdde‘î-i mersûm Yorgo zimmî külliyyen inkârından mâ‘adâ mersûm Vasil zimmî cihet-i mezkûreden ol kadar guruş bana zimmetinde sahîhan deyni olduğunu târih-i i‘lâmdan bir gün mukaddem mahrûse-i mezbûrede Fermeneciler sûkunda kâin esnâf-ı merkūmeye mahsûs Lonca Odası’nda mahzar-ı şuhûdda tâyi‘an ve kat‘iyyen ikrâr ve işhâd etmişidi deyü muahhar tarih ile eylediği ikrâr da‘vâsını lede’t-tezkiye makbûlü’ş-şehâde idükleri ihbâr olunan esnâf-ı merkūme ustalarından Yorgi v. Nikola ve Petro v. Mihal zimmîler şehâdetleriyle mersûm Vasil zimmî muvâcehesinde vech-i vecih-i şer‘î üzere isbât etmeğin mûcebince meblağ-ı merkūm yüz on altı buçuk guruşu müdde‘î-i mersûm Yorgo zimmîye edâ ve teslîme mersûm Vasil zimmîye tenbîh olunduğu bi’l-iltimâs [huzûr-ı âlîlerine i‘lâm olundu.] Fî 19 Receb sene [1]221.